Siku indu 14 taun parai, dipasung enggau dibunuh sulu ati iya
Cari Berita

Advertisement

Siku indu 14 taun parai, dipasung enggau dibunuh sulu ati iya

Chief Editor | Berita Iban MY
August 28, 2019

NGENA AMAT GAMAL: Gamal Yogi (saspek) ke dipechayaka masung enggau munuh indu nya.

INDONESIA: Siku lelaki, ditan polis pengudah dipechayaka masung enggau munuh siku indu, 14 taun, ketegal enggai dibaie iya beleman mali.

Nitihka ripot ke dipansutka Tribun, penusah nyadi kena 17 Ogos di Kecamatan Tapung Hulu, Indonesia.

Indu nya bekelala enggau lelaki nya, Yogi Pratama (saspek), 19 taun ari Facebook.

Pemuas seduai iya berandau ba media sosial enggau ngejungka seduai beambu pangan diri nyadi sulu ati.

Pengudah nya, seduai iya pan bejanji deka begulai nurun ke pasar, kena 17 Ogos 2019.

Yogi ngena motosikal Yamaha Vixion ngambi indu nya ke rumah enggau mai iya ke langkau mit di Mindal, Kelurahan Simpang Belutu.

KASIH AMAT: Pendiau ba langkau mit ke endur Yogi enggau indu nya.

Lebuh datai ba langkau mit nya, Yogi mai indu nya beleman mali. Keterubah iya, indu nya ka dibaie Yogi beleman mali.

Sebedau seduai iya belabuh, indu nya berubah ati enggau minta Yogi ngetu ngereja ulah ti enda menuku nya.

Nangkan ke nya, indu nya pan ngelarika diri ari langkau nya, tang Yogi pan belandak ngagai iya ari belakang enggau mai sebatang cangkul lalu maluk indu nya empat kali (dua kali ba pala enggau dua kali ba punggung indu nya) enggau ngejungka indu bakal enggau terap.

Ukai nya aja, Yogi ngekak indu nya sampai parai sebedau iya masung bangkai indu nya enggau ngelarika diri ari palan penusah ke nyadi.

Kelimpah ari nya, Yogi mega nabanka talipaun binching ke diempu indu nya enggau nyual ngagai bakih iya.

Ulah ke digaga Yogi nya tebantai pengudah siku orang bekebun mit, Tumiran, ke diau semak endur palan penusah ke nyadi tepedaka bangkai indu nya lebuh iya bejalai ke kebun.

Pengudah nya, Tumiran lalu berumban nganggauka polis enggau ngeripotka bisi siku indu parai semak kebun iya nya.

Raban polis lalu bejalaika pengawa mansik enggau nyidi kes nya.

13 jam pengudah nya, raban polis mujur nangkap Yogi enggau iya ngaku udah munuh indu nya.

Asil pansik silik, raban polis madahka kebuah Yogi ngaga tauka munuh indu nya baka nya ketegal indu nya enggai dibaie iya beleman mali.

Kes nya deka pasukka ba kort, enggau Yogi ditukuka udah salah laban udah masung enggau munuh indu nya.