Siku lelaki bebadi nyawa lantak kerita, ngelayang jalai
Cari Berita

Advertisement

Siku lelaki bebadi nyawa lantak kerita, ngelayang jalai

Chief Editor | Berita Iban MY
August 19, 2019

KASIH AMAT: Bangkai lelaki nya dilabung ngena kain burak.

BINTULU: Siku lelaki bebadi nyawa pengudah kena lantak sebuah kerita lebuh iya ngelayang jalai di Batu 9, Jalan Bintulu-Miri, urung jam 10.15 malam, Hari Satu.

Kepala Opis Tasat enggau Penguasa Trafik Sarawak, Superintenden Alexson Naga Chabu, madahka lelaki dikelala ngena nama Mawan Sulang, 34 taun, parai ba palan eksiden ke nyadi ketegal balat bakal ba pala enggau tubuh.

"Asil pansik tumu, eksiden nyadi bepun ari pengilap lelaki ke bejalai kaki nya lebuh iya deka ngelayang jalai sebedau iya kena lantak kerita ke ditepan siku indu, 32 taun, ti benung bejalai muak ari Tanjung Kidurong.

"Pansik silik deka dipejalaika ngambika ulih nemu kebuah eksiden nyadi enggau ngejungka lelaki nya lesi bebadi," kuniya lebuh ke dirandau pengarang berita.

Bangkai lelaki nya udah dianjung ke Rumah Bangkai Sepital Bintulu ngambika ulih dibuntas tasat.

Kes nya dipansik ari baruh Seksyen 41(1) Akta Pengangkutan Jalan (APJ) 1987.