Siku lelaki ditan polis, mantap orang berimbai rumah ba perut, pala
Cari Berita

Advertisement

Siku lelaki ditan polis, mantap orang berimbai rumah ba perut, pala

Chief Editor | Berita Iban MY
August 31, 2019

GRAPHIK PENGIAS: Logo Polis Diraja Malaysia

KUCHING: Siku lelaki bakal perut pengudah kena pantap orang ke berimbai rumah enggau iya di Kampung Semilang, ditu, tumu pagi tadi.

Penusah nyadi urung jam 12.30 pagi lebuh saspek, 32 taun, dipechayaka agi sebening pala pengudah makai dadah mansang semak asuh lelaki nya (victim), 49 taun.

Nitihka penerang, seduai iya bisi beperekuhka tauka belibat enggau pangan diri sebedau saspek mantap lelaki nya ngena duku ba perut enggau pala.

"Kenyau ari taun 2017, saspek sigi bisi ngembuat ati ti chelum tauka dendam enggau lelaki nya ketegal lelaki nya kala ngeripotka saspek nya makai dadah ngagai polis enggau ngejungka iya kena tangkap.

"Nya alai, saspek malam tadi mansang lalu nyerang lelaki nya laban deka malas dendam.

"Nasib manah lebuh penusah nyadi genturung pendiau dia mujur ngelara seduai iya enggau nyelamatka lelaki nya," ku iya lebuh ke dirandau pengarang berita.

Pengudah nya, lelaki ke bakal ba perut nya dianjung ke Sepital Besai Sarawak (HUS) ngambika ulih diperubatka enggau silik agi.

Enda lama pengudah penusah nyadi, saspek mujur ditangkap genturung pendiau dia enggau nyua ke iya ngagai raban polis.

"Saspek mega bisi bakal ba pala enggau udah dianjung ke Sepital Besai Sarawak sebedau raban polis bejalaika pengawa mansik silik," ku iya.

Bala ke sama sepintu bilik enggau lelaki nya mega udah ngeripotka penusah ke nyadi ngagai polis.

"Asil peresa ai kemi, saspek nya dipechayaka positif dadah syabu," tandu iya.

Naka berita tauka artikel ke ditulis, lelaki nya agi diperubatka ba wad Emergency HUS.