Siku lelaki parai, brek lori rusak
Cari Berita

Advertisement

Siku lelaki parai, brek lori rusak

Chief Editor | Berita Iban MY
August 31, 2019

KASIH AMAT: bangkai niang dilindung ngena payung ba palan eksiden ke nyadi.

BINTULU: Siku lelaki parai pengudah motosikal ke ditepan iya kena lantak sebuah lori ti sarat ngundan besi lebuh eksiden nyadi ba traffic light di Jalai Sebiew, urung jam 5 lemai, kemari.

Kepala Opis Tasat enggau Penguasa Trafik Sarawak, Superintenden Alexson Naga Chabu, madahka lelaki  ke parai nya dikelala ngena nama, Hanaffiee Norsah, 50 taun.

Ku iya, raban paramedik ari Unit Ambulans Sepital Bintulu nguji nyelamatka lelaki nya, tang lelaki nya diripotka balat bakal ba pala enggau ngejungka iya parai.

"Asil pansik tumu, eksiden nyadi bepun ari brek lori nya enda makai tauka udah rusak lalu ngelaban traffic light ti benung mirah enggau ngelantak motosikal ke ditepan lelaki nya ke benung mansang muak ari sepiak kanan," ku iya lebuh ke dirandau pengarang berita.

Ketegal eksiden nya, lelaki nya enggau motosikal ke ditepan iya tepawah lalu tepelanting ke tetengah jalai.

Tang lelaki ke deriba lori nya, 45 taun, diripotka selamat tauka nadai nenama.

Bangkai lelaki ke deriba motosikal nya udah dibai ke Rumah Bangkai Sepital Bintulu ke bejalaika pengawa buntas tasat.

Kes nya deka dipansik ari baruh Seksyen 41(1) Akta Pengangkutan Jalan (APJ) 1987.