Kerita bepeling, siku lelaki parai di Kilometer 14 Jalai Kota Samarahan-Mambong
Cari Berita

Advertisement

Kerita bepeling, siku lelaki parai di Kilometer 14 Jalai Kota Samarahan-Mambong

Chief Editor | Berita Iban MY
September 1, 2019

BALAT AMAT: Pendiau kerita ke ditepan Dylan enggau bakih iya pengudah eksiden nyadi.

KUCHING: Siku lelaki parai pengudah kerita ke ditepan iya enda ulih dijaga sebedau tepawah di Kilometer 14 Jalai Kota Samarahan-Mambong, tumu pagi tadi.

Kepala Opis Tasat enggau Penguasa Trafik Sarawak, Superintenden Alexson Naga Chabu, madahka lelaki ke parai nya dikelala ngena nama, Dylan Bryan Richard Rockie, 21 taun.

"Eksiden nyadi urung jam 3 pagi, lebuh Dylan enggau siku agi bakih iya dipechayaka benung dirantau jalai deka pulai ke rumah di Taman Stella, Batu 12 Jalai Kuching-Serian.

"Lebuh datai di Kilometer 14 Jalai Kota Samarahan-Mambong, kerita ke ditepan seduai iya dipechayaka tepawah lalu bepeling beberapa kali enggau ngejungka kerita nya telentang ba sepiak jalai kiba enggau orang ke deriba tepelanting ari kerita nya," ku iya lebuh ke dirandau pengarang berita, sehari tu tadi.

Ku Alexson, ketegal eksiden nya mega Dylan diripotka balat bakal ba pala enggau dianjung ke Sepital Jantung Sarawak (HUS), Kota Samarahan.

Dylan diripotka ngapuska seput kepenudi lebuh iya diperubatka ba Unit Emergency Sepital nya.

Tang bakih ke numpang kerita nya, siku lelaki, 22 taun, orang ari Taman Samarindah, Kota Samarahan diripotka selamat, semina telih mimit ba jari kiba iya.

Ku iya, pendiau ba palan eksiden ke nyadi bisi jalai dua bagi, dua lorong enggau jalai nya lurus. Maya nya mega gaya hari benung manah tang semina ba palan nya petang laban ke nadai api jalai.

Kes nya dipansik ari baruh Seksyen 41 (1) Akta Pengangkutan Jalan 1987.