Siku agi bedau kena tangkap..
Cari Berita

Advertisement

Siku agi bedau kena tangkap..

Chief Editor | Berita Iban MY
September 2, 2019

KASIH AMAT: Pelajar nya semina ngenanka pemedis diri lebuh ke dijamah salah siku ari saspek.

KUCHING: Tiga iku agi anembiak ke dipechayaka bekait enggau kes nyamah siku pelajar pom dua di Jalai Macdougall, enggau viral ba media sosial udah mujur ditangkap polis.

Kepala Polis Pampang Kuching, ACP Awang Din Awang Gani, madahka lima iku ari enam iku semua sida iya ke dipechayaka bekait enggau kes nyamah pelajar pom dua nya, udah mujur ditangkap.

"Naka kediatu, nyau ka semua sida iya udah kena tangkap. Raban polis ditu agi ngiga siku agi saspek ke bekait enggau kes nya," ku iya lebuh ke dirandau pengarang berita, sehari tu tadi.

Ku Awang Din, sebedau tu, dua ari enam saspek udah mujur ditangkap polis.

"Dua saspek nyanya ditangkap lemai, 31 Ogos. Pengudah pelajar ke dijamah sida iya nya ngaga ripot polis.

"Ripot polis digaga pengudah video ke dirikod lebuh penusah nyadi dipansutka siku ari saspek viral ba media sosial.

"Sebedau penusah nyadi, urung jam 8 pagi nya, dua ari saspek nganggauka pelajar pom dua nya (victim) ke belakang sebuah hotel enggau pelajar nya dipechayaka udah enchuri insap karan (vape) salah siku ari enam saspek nya.

"Tang taja pia, pelajar nya enda ngaku. Nya alai, siku ari saspek lalu maluk enggau nyipak pelajar nya ba palan penusah ke nyadi.

"Bisi empat iku agi saspek ke meda tau ngemataka lebuh penusah ke nyadi nyadi batu api tauka ngasuh saspek nya nyamah tauka ngelaya pelajar nya.

"Siku ari saspek ngerikod video semua pekara ke nyadi ba palan penusah ke nyadi enggau ngayanka video nya ba media sosial,” ku iya.

Semua sida ke bekait enggau kes nya pelajar pom dua nyentuk pom empat enggau sama belajar ba sebuah sekula di Kuching.

Enti nyema ditukuka salah, semua saspek ulih kena ukum jil maksimum lima taun tauka ukum mata duit tauka tauka kededua nya sekali.

Kes nya agi dipansik ari baruh Seksyen 148 Kanun Keseksaan.