Siku anak mit OKU ditemu parai, mandi di sungai tang enda madahka orang tuai
Cari Berita

Advertisement

Siku anak mit OKU ditemu parai, mandi di sungai tang enda madahka orang tuai

Chief Editor | Berita Iban MY
September 15, 2019

KASIH AMAT: Raban APM ngatung bangkai Selvester.

SIBU: Bangkai siku anak mit Orang Timpang Pendiau (OKU) ke diripot lenyau pengudah mandi begulai enggau dua iku menyadi iya ditemu peranak Rumah Gawan di Sungai Balleh, Lepong Balleh, ditu, pagi kemari.

Kepala Polis Pampang Kapit, DSP Freddy Bian, madah anak mit ke parai nya dikelala ngena nama Selvester Erukson Burung, lapan taun ditemu urung penyauh 50 meter ari endur iya ke diripot lenyau, jam 7 pagi tadi (kemari).

Ku Freddy, bala ke sebilik enggau anak mit nya bisi ngaga ripot polis urung jam 6.50 lemai kemari pengudah meda iya nadai pulai ke rumah panjai.

Ku iya, Operasyen Ngiga enggau Nyelamat (SAR) tembu urung jam 9.54 pagi ba hari kedua pengudah tetemuka bangkai anak mit nya.

Sebedau tu, operasyen SAR alu dipejalaika raban polis pengudah nerima ripot bisi tetemuka sepasang baju enggau tanchut ke dipechayaka diempa anak mit nya ba tebing sungai, lemai kemari.

"Sebedau penusah nyadi kejadian, Selvester enggau dua iku menyadi tuai iya mandi di sungai tang sida iya tiga nadai madahka apai indai sida iya," ku iya lebuh dirandau pengarang berita.

Raban Bomba enggau Raban Penyaga  Pengelikun Mensia Mayuh (APM) Pampang Kapit mega bisi datai mantu lebuh bejalaika operasyen SAR ba palan penusah ke nyadi.