Siku lelaki parai, ngam-ngam kena ba hari pengada iya..
Cari Berita

Advertisement

Siku lelaki parai, ngam-ngam kena ba hari pengada iya..

Chief Editor | Berita Iban MY
September 10, 2019

KASIH AMAT: Reynold diripot ngapuska seput kepenudi ba palan eksiden kenyadi ketegal balat bakal.

SARATOK: Siku lelaki, ngam-ngam manggai umur 47 taun, diripotka parai pengudah motosikal ke ditepan iya belantak enggau treler di KM2.5, Jalai Saratok, urung jam 4:30 lemai kemari.

Nitihka penerang ke diterima kami, lelaki nya dikelala ngena nama Reynold Melila Alban Ling, orang ari Rh. Mat Ring, Tembawai Kapok, udah ngapuska seput kepenudi palan eksiden kenyadi.

Kepala Polis Pampang (KPD) Saratok, Deputi Superintendan Mordani Tanin, madahka penusah ke enda disadang nyadi lebuh hari pengada (birthday) tauka ngam-ngam Reynold Melila Alban Ling manggai umur 47 taun (9 September).

Ku iya, raban perubat ari Sepital Saratok ke bisi ngesah kia madahka Reynold udah ngapuska seput ke penudi ba palan eksiden ke nyadi pengudah ke pansa tauka indik tayar sepiak kiba treler nya enggau ngejung ke iya balat bakal ba pala, tubuh enggau jari kiba iya.

"Asil pansik tumu, eksiden nyadi lebuh motosikal Yamaha ke ditepan Reynold enda memukai masuk ngenyit ke jalai, ngam-ngam ga maya nya sebuah  treler benung bejalai nurun ba jalai bisi bukit nya ari muak ke simpang Saratok.

"Deriba treler nyuji nyeliahka motosikal Reynold enggau ngambi jalai (lorong) sepiak kanan.

"Tang enda ulih diseliahka deriba treler nya enggau ngejungka iya ngelantak Reynold ke benung mai motosikal nya.

"Ba eksiden ke sama, motosikal ke ditepan Reynold tepawah ke jalai ngelaban arus enggau ngejung ke iya ensuruk ba baruh treler sebedau iya kena indik tayar treler nya," ku iya lebuh ke dirandau pengarang berita, malam tadi.

Nangkan ke nya, Reynold balat bakal enggau diripotka raban perubat udah enda ulih diselamatka agi tauka udah ngapuska seput kepenudi ba palan eksiden ke nyadi.

Taja pia, deriba treler, 28 taun, orang ari Pekan Machan, Kanowit diripot nadai nenama tauka selamat.

Bangkai niang Reynold pengudah nya dianjung ke Unit Forensik Sepital Saratok enggau deka dibuntas tasat urung jam 2:00 lemai tu, legi.

Raban polis agi mansik kes tu enggau kes nya deka dipansik ari baruh Seksyen 41 (1) Akta Pengangkutan Jalan (APJ) 1987.