Ditemu tekait ba dan kayu
Cari Berita

Advertisement

Ditemu tekait ba dan kayu

Chief Editor | Berita Iban MY
October 12, 2019

KASIH AMAT: Bangkai Seli ditemu raban SAR urung jam 10 pagi ba hari kedua.

SIBU: Bangkai siku lelaki ke dipechayaka lemas pengudah labuh ke Sungai Tekalit, Song, ditu, udah temu lebuh bejalaika Operasyen Ngiga enggau Nyelamat (SAR) ba hari kedua, pagi tu tadi.

Pengari Opis Operasyen (PGO) Bomba Sarawak, madahka bangkai Seli anak Gong, 41 taun, ditemu raban bomba enggau orang mayuh urung jam 10 pagi.

Bangkai Seli ditemu tekait ba dan kayu, urung penyauh sekilometer ari palan 'Pos Kawalan Bomba'.

"Lebuh ke ditemu, Seli diripotka udah nadai enggau bangkai iya dibai pulai ke Song laban deka disuakka ngagai raban polis ngambika ulih bejalaika pengawa silik agi," ku iya lebuh dirandau pengarang berita.

Nitihka penerang ke Berita Iban Online, penusah nyadi dipechayaka pagi kemari, Seli pansut ari rumah begulai enggau siku bakih iya laban deka meli perengka ke dikena sembiang di Rh Endah, Nanga Sepayang Tekalit.

Lebuh seduai iya datai ba Nanga Sepayang, Seli mega dibaie bakih iya enggau orang betambak (nanam padi).

Sebedau Seli deka mulaika diri ke rumah, bala ke sama enggau iya betambak bisi ngetanka iya tauka enda ngasuh iya pulai dulu laban iya dipechayaka agi sebening pala (mabuk) tang jaku lalau nya enda dikeibuhka iya.

Enda lama pengudah nya, siku lelaki ke diau di Nanga Latong bisi tepedaka sebuah perau anyut tang ba perau nya nadai orang.

Nangkan ke nya, lelaki nya lalu madahka pekara nya ngagai bala mayuh ke diau di Rh Changgai.

Lapan iku raban Balai Bomba (BBP) Song, diuluka PBK II Nasihin Jaum lalu berumban ngesah ke palan penusah ke nyadi ngambika ulih bejalaika OperasyenNgiga enggau Nyelamat (SAR) pengudah nerima kanggau urung jam 10:30 pagi.

Operasyen SAR nya mega dibantu peranak menua nya, raban polis, RELA enggau raban ari Opis Pengerai.