Tepelanting ke dalam parit
Cari Berita

Advertisement

Tepelanting ke dalam parit

Chief Editor | Berita Iban MY
October 13, 2019

KASIH AMAT: Raban bomba benung deka ngatung Edwin (segala) niki katas.

SIBU: Siku lelaki parai pengudah motosikal ke ditepan iya eksiden di Jalai Kemuyang, ditu, sehari tu tadi.

Nitihka penerang ke diterima Berita Iban Online, lelaki nya dikelala ngena nama Edwin Johny, 38 taun, orang ari Rumah Barnabas, Batu Luking di Kanowit diripotka ngapuska seput kepenudi ba palan eksiden ke nyadi ketegal balat bakal.

Kepala Opis Bomba enggau Penyelamat Malaysia (JBPM) Zon Sibu, Wan Kamaruddin Wan Ahmad madahka, seraban bomba dipinta ngesah ke palan eksiden ke nyadi ngambika ulih bejalaika operasyen nyelamat pengudah sida iya nerima ripot bekait enggau eksiden ke nyadi, urung 2.58 lemai tu tadi.

"Lebuh datai ba palan eksiden ke nyadi, raban bomba madahka raban perubat ari Sepita Sibu mega bisi datai ngesah ke palan eksiden nya mega enggau minta bantu ari raban bomba ngatung Edwin ke dipechayaka tepelanting ke dalam parit ba tisi jalai besai nya," ku iya lebuh dirandau pengarang berita, sehari tu tadi.

Ku Wan, nurun enggau tama ke dalam parit nya laban deka mai Edwin niki katas sebedau nyuakka iya ngagai raban perubat ngambika ulih diperesa.

"Asil peresa raban perubat, Edwin udah enda ulih diselamatka agi tauka udah nadai ba palan eksiden ke nyadi," ku iya.

"Bangkai Edwin udah disuakka ngagai raban polis ngambika ulih bejalaika pengawa silik agi," tandu iya.