Siku anembiak lelaki parai kena indik lori
Cari Berita

Advertisement

Siku anembiak lelaki parai kena indik lori

Chief Editor | Berita Iban MY
November 27, 2019

KASIH AMAT: Bangkai George (segala oren) dilamun ngena kain burak.


BINTULU: Siku anembiak lelaki parai pengudah motosikal ke ditepan iya belantak enggau lori kargo ba Jalai Tanjung Kidurong, di Bintulu, kemari.

Nitihka  penerang ke diterima beritaiban.com, eksiden nyadi semak traffic light urung jam 3 lemai kemari.

Anembiak lelaki ke ngena motosikal nya dikelala ngena nama, George Gorygory, 19 taun, diripotka ngapuska seput kepenudi ba  palan eksiden ke nyadi ketegal balat bakal ba pala.

Kepala Opis Tasat enggau Trafik (JSPT) Sarawak, Superintendan Alexson Naga Chabu madahka, kebuah eksiden nyadi bepun ari motosikal Modenas GT ke ditepan George enda ulih dijaga lalu ngejungka iya nyeging lori nya ari sepiak kiba.

"Ba eksiden ke sama, George labuh enggau ensuruk ke baruh lori nya sebedau iya kena indik lori nya.

"Pemesai raba perubat ke bisi ngesah ke palan eksiden ke nyadi madahka George udah enda ulih diselamatka agi ketegal balat bakal ba pala," ku iya lebuh dirandau pengarang berita sehari tu tadi.

Ku Alexaon, bangkai George pengudah nya dianjung  ke Sepital Bintulu kena bejalaika pengawa buntas tasat.

"Taja pia, deriba lori nya, 25 taun, diripotka nadai nenama tauka selamat.

"Kes tu deka dipansik ari baruh Seksyen 41(1) Akta Pengangkutan Jalan 1987," ku iya.