Siku indu ditemu parai ba dalam kerita di Kuching
Cari Berita

Advertisement

Siku indu ditemu parai ba dalam kerita di Kuching

Chief Editor | Berita Iban MY
November 27, 2019

KASIH AMAT: Raban polis benung bejalaika pengawa mansik ba palan penusah ke nyadi.

KUCHING: Enda berasai neritik ai mata siku lelaki labuh naya pengudah nemu bini dikesayauka iya enda ngeleda ba dalam kerita di paking kerita Sepital Besai Sarawak (HUS), di Kuching, Hari Satu tu tadi.

Kepala Polis Pampang Kuching, Asisten Komisioner Awang Din Awang Gani madahka, lelaki 45 taun nya mecahka cheremin kerita pengudah bini iya ke benung gali ba dalam kerita nya enda nyaut kanggau iya.

"Pengudah mujur mecahka cheremin kerita, lelaki nya madahka diri bisi nyium bau but sebedai iya ngaga ripot polis.

"Raban perubat ke bisi ngesah ke palan penusah ke nyadi madahka indu nya udah nadai" ku iya lebuh dirandau  pengarang berita, kemari.

Ku Awang Din, sebedau tu, lelaki nya madah kerita nya dikena indu nya (bini iya), 43 taun, urung jam 9.15 malam, Hari Minggu tu tadi.

"Asil pansik tumu, indu nya pansut ari rumah ngena kerita nya kena Hari Minggu.

Nitihka penerang ke diterima beritaiban.com, indu nya enggau laki iya udah jadi melaki-bini pengelama 20 taun enggau bisi dua anak.

"Asil peresa raban polis ba palan penusah ke nyadi, sida iya bisi tetemuka dua dua iti surat ti ditulis ngena jari dalam jaku cina ba dalam kantung sandik indu nya.

"Nitihka penerang ari lelaki nya (laki indu nya) enggau anak iya, ba dalam surat nya, indu nya nuliska sebana ati iya lalu madahka diri bisi penanggul ke ditapi iya enggau tusut runding berundingka pengidup iya," ku iya.

Awang Din madah, nadai bekau nyelaie ba tubuh indu nya enggau tubuh indu nya udah belabuh bau but enggau reput ketegal indu nya dipechayaka udah nadai lebih ari 24 jam.

"Bangkai indu nya udah dianjung ke Sepital Besai Sarawak (HUS) kena bejalaika  pengawa silik agi enggau kes tu ditukuka nyadi parai ngenyit," ku iya.