Siku lelaki parai, motosikal belantak enggau sebuah kerita
Cari Berita

Advertisement

Siku lelaki parai, motosikal belantak enggau sebuah kerita

Chief Editor | Berita Iban MY
November 30, 2019

KASIH AMAT: Pendiau ba palan eksiden ke nyadi.

KUCHING: Siku lelaki deriba motosikal parai ketegal balat bakal ba pengudah eksiden semak Kampung Punau, di Jalai Puncak Borneo, ditu, kemari.

Chief Opis Tasat enggau Penguasa Trafik Sarawak, Superintenden Alexson Naga Chabu madah, lelaki ke ngena motosikal  nya dikelala ngena Celestine Najep, 26 taun enggau orang ari Kampung Serumah, Padawan.

Ku iya, eksiden dipechayaka nyadi urung jam 7.15 malam, maya nya Celestine kediri ngena motosikal ari pasar deka mulaika diri ke rumah iya.

"Lebuh datai ba palan eksiden ke nyadi, Celestine dipechayaka tama ke jalai ngelaban arus enggau ngejung ke iya belantak enggau sebuah kerita ke mansang ari Kampung Bunuk nuju ke pasar.

Raban paramedik ari Sepital Besai Sarawak (HUS) ke bisi datai ngesah kia madahka Celestine udah ngapuska seput kepenudi ba palan eksiden ke nyadi. 

"Kededua entuka ke bekait enggau eksiden nya dibaie ke IPD Padawan laban deka diperesa Puspakom enggau Opis Kimia.

"Bangkai Celestine pengudah nya dianjung ke Sepital Besai Sarawak (HUS) kena bejalaika pengawa buntas tasat," ku Alexson.

"Taja pia, kes tu agi dipansik ari baruh Seksyen 41(1) Akta Pengangkutan Jalan 1987. Barang sapa ke bisi penerang silik bekait enggau eksiden nya tau ngaga ripot ngagai balai polis ke semak ngambika ulih mantu raban polis mansik kes nya," tandu iya.