Siku lelaki parai, motosikal ensuruk baruh lori
Cari Berita

Advertisement

Siku lelaki parai, motosikal ensuruk baruh lori

Chief Editor | Berita Iban MY
November 30, 2019

KASIH AMAT: Sujang (segi empat panjai) diripot parai ba palan eksiden ke nyadi ketegal balat bakal.

SARATOK: Siku lelaki parai pengudah motosikal ke ditepan iya ensuruk ba baruh lori ngundan kepala sawit di Kilometer 73 Jalai Betong-Sarikei, lemai Hari Lima.

Nitihka penerang ke diterima beritaiban.com, lelaki nya dikelala ngena nama Sujang Bilun, 20 taun, orang ari Rumah Ganya, Nanga Lempa, Kabo Saratok.

Chief Polis Pampang (KPD) Saratok, DSP Mordani Tanin madah, eksiden dipechayaka nyadi urung jam 6 petang, semak endur simpang Mendas, ditu.

Ku iya, lebuh eksiden nyadi, lori ke ngundan kepala sawit nya benung bejalai ari Kuching nuju ke Saratok.

Ku iya, nitihka penerang ke diambi ari deriba lori, 25 taun, deriba lori nya madah bisi ninga munyi utai ti ingar ari belakang lori nya lebuh maya iya deriba.

"Nangkan ke nya, deriba lori nya alu meda cheremin tisi kanan, dia deriba lori nya tepedaka sebuah motosikal ngelantar tepawah ba atas jalai alun enggau iya mega bisi meda tubuh mensia udah tama ke baruh lori ke ditepan iya nya," ku iya lebuh dirandau pengarang berita sehari tu tadi.

"Deriba lori nya alu nekanka brek ngenyit ngambika ulih ngetuka lori nya.

"Pengudah deriba lori nya nekan brek, tang enda disadang lelaki  ke ngena motosikal nya mengkang ba tetengah tayar belakang lori," ku iya.

Ku Mordani, asil pansik silik lelaki ke ngena motosikal nya nadai lesen deriba entuka.

Raban perubat ari Sepital  Saratok ke bisi ngesah ke palan eksiden ke nyadi madahka lelaki ke ngena motosikal nya enda ulih diselamatka agi tauka udah nadai ketegal balat bakal ba pala, tubuh enggau jari kiba iya.

Tang deriba  lori nya nadai nenama tauka selamat.

Bangkai lelaki ke ngena motosikal nya udah dianjung ke Sepital Saratok ngambika ulih bejalai ke pengawa buntas tasat enggau kebuah eksiden nyadi agi benung dipansik.