12 December 2019 - Hari Empat ba Minggu Kedua Musim Penatai (Adven) -->
Cari Berita

Advertisement

12 December 2019 - Hari Empat ba Minggu Kedua Musim Penatai (Adven)

Admin | beritaiban@gmail.com
December 12, 2019

Maria lalu bejaku, “Aku tu nembiak Tuhan. Awakka utai nya nyadi ba aku nitihka jaku  nuan.” Melikat nya lalu ninggalka  iya. - Luke 1:38

Bacha Ke Satu: Sekariah 2: 10 - 13

Ku TUHAN bejaku, “Belagu enggau ati ti gaga meh kita orang Jerusalem, laban Aku deka datai lalu diau enggau kita!”

Lebuh maya nya ila, mayuh bengkah bansa deka datai ngagai TUHAN, lalu nyadika nembiak Iya.

Iya deka diau enggau kita, lalu kita deka nemu Iya udah ngirumka aku ngagai kita.

Judah deka nyadi pesaka TUHAN baru di menua Iya ti kudus, lalu Jerusalem deka nyadi nengeri ti pemadu dikerinduka Iya.

Anang inggar semua kita di mua TUHAN, laban Iya deka datai ari endur Iya ti kudus.

Tauka: Pemandang 11: 19A; 12: 1 - 6A, 10AB

Rumah Sembiang Allah Taala di serega lalu dibuka, lalu Peti Lampang Batu Adat bisi dipeda dalam Rumah Sembiang nya.

Udah nya siti tanda ti besai lalu pegari di langit, iya nya siku indu ke begari ngena mata hari, lalu kaki iya bepelasarka bulan, lalu ba pala iya bisi siti makota ti digaga ari dua belas igi bintang.

Iya ngandung lalu nyabak laban iya radai deka beranak.

Siti agi tanda pegari di langit, iya nya siku naga ti besai ti bechura mirah, ti bisi tujuh igi pala enggau sepuluh iti tanduk, enggau tujuh iti makota ba pala iya.

Iya narit sebagi ari tiga bagi bintang ti di langit ngena iku iya, lalu nikauka sida ke baruh ngagai dunya.

Naga nya lalu bediri di mua indu ke baru deka beranak nya, deka makai anak indu nya lebuh anak mit nya ada.

Indu nya lalu ngadaka anak lelaki siku, ti deka merintah semua bansa ngena sebatang besi.

Tang anak iya dirampas lalu dibai ngagai Allah Taala enggau ngagai kerusi diraja Iya.
Indu nya lalu rari ngagai menua puang, ngagai siti endur ti udah disedia Allah Taala ke iya.

Aku lalu ninga nyawa ti inggar bejaku di serega, “Diatu pengelepas, kuasa enggau Perintah Allah Taala kitai, enggau kuasa Kristus Iya, udah datai.

Masmur Entara: Judit 13: 18BCDE, 19

Saut (peda 15: 9d): Nuan meh mulia makuta Jerusalem, ti ngasuh bansa kitai temegah sereta gaga!

Ke Satu
Allah Taala ti Pemadu Bekuasa
udah merekat nuan lebih ari semua indu di dunya!

Saut: Nuan meh mulia makuta Jerusalem, ti ngasuh bansa kitai temegah sereta gaga!

Ke Dua
Pengarap nuan ke Allah Taala
tetap deka dikingatka semua orang ti ngenang kuasa Iya.

Saut: Nuan meh mulia makuta Jerusalem, ti ngasuh bansa kitai temegah sereta gaga!

Alleluia
Alleluia, alleluia
Beberekat meh nuan, Maria dara tuchi ti kudus, ti patut bempu semua puji;
Kristus ti Allah Taala kami, datai ari nuan.
Alleluia.

Bacha Injil: Luke 1: 26 - 38

Dalam bulan ti keenam Elisabet betubuh-bisi, Allah Taala ngasuh melikat Gabriel datai ngagai sebuah nengeri ti dikumbai Nasaret di menua Galili,

ngagai siku dara bungas ke betunang enggau lelaki siku ke benama Josep ke ari peturun David. Nama dara bungas nya Maria.

Melikat nya datai ngagai iya, lalu bejaku, “Tabi ke nuan, ke dikerinduka Allah Taala! Tuhan bisi enggau nuan!”

Tang Maria beba runding ninga jaku melikat nya, lalu belematika reti jaku tabi nya.

Lalu ku melikat nya bejaku ngagai iya, “Anang takut, Maria, laban nuan dikerinduka Allah Taala.

Lalu diatu nuan deka betubuh-bisi, lalu ngadaka anak lelaki siku, lalu nuan deka meri iya nama Jesus.

Iya deka nyadi orang ke tinggi pangkat, lalu Iya deka dikumbai Anak Allah Taala ti Pemadu Tinggi, lalu Tuhan Allah Taala deka meri Iya kerusi diraja aki Iya David.

Iya deka merintah peturun Jakop belama iya, lalu Perintah Iya enda nemu abis!”

Maria lalu bejaku ngagai melikat nya, “Baka ni ku utai tu tau nyadi, laban aku dara bungas?”

Ku melikat nya bejaku enggau iya, “Roh Kudus deka datai atas nuan, lalu kuasa Allah Taala ti Pemadu Tinggi deka ngayung nuan.

Nya alai anak mit ti deka diadakanya kudus.

Iya deka dikumbai Anak Allah Taala.

Lalu diatu petunggal nuan Elisabet benung betubuh-bisi taja pen iya nyau tuai.

Tu keenam bulan iya betubuh-bisi, taja pen iya dikumbai mandul.

Laban nadai utai enda ulih dikereja Allah Taala.”

Maria lalu bejaku, “Aku tu nembiak Tuhan. Awakka utai nya nyadi ba aku nitihka jaku nuan.”

Melikat nya lalu ninggalka iya.

Tauka: Luke 1: 39 - 47

Maria angkat lalu beguai-guai mupuk ngagai sebuah nengeri di menua Judah ti bebukit, tama ngagai rumah Sekariah, lalu meri tabi basa ngagai Elisabet.

Lebuh Elisabet ninga jaku tabi Maria, anak mit ti dalam kandung Elisabet lalu engkebut.

Penuh laban Roh Kudus, Elisabet lalu bejaku enggau nyawa ti inggar, “Beberekat meh nuan ari semua indu bukai, lalu beberekat meh anak ke dikandungka nuan!
Lalu nama kebuah utai tu nyadi ba aku, datai ke indai Tuhan aku nyau nemuai ngagai aku?

Laban lebuh aku ninga jaku tabi nuan tadi, anak mit ke dalam kandung aku engkebut gaga ati.

Beberekat meh iya ke arapka jaku Tuhan deka dikamatka!”

Maria lalu bejaku, “Semengat aku ngemesaika Tuhan, lalu ati aku gaga ke Allah Taala ti Juruselamat aku.”