13 December 2019 - Hari Lima ba Minggu Kedua Musim Penatai (Adven) -->
Cari Berita

Advertisement

13 December 2019 - Hari Lima ba Minggu Kedua Musim Penatai (Adven)

Admin | beritaiban@gmail.com
December 13, 2019

"Aku tu TUHAN Allah Taala kita, ti deka ngajar kita utai ke penguntung kita lalu nunjukka jalai ti patut ditengah kita." -Isaiah 48-17

Bacha Ke Satu:
Isaiah 48: 17 - 19

Ku Allah Taala ke disembah orang Israel ti kudus, TUHAN ti nebus kita, bejaku:
“Aku tu TUHAN Allah Taala kita, ti deka ngajar kita utai ke penguntung kita lalu nunjukka jalai ti patut ditengah kita.

Enti sema kita udah mendingka jaku Aku nya baru berekat tentu udah rarat ngagai kita baka sungai ti enda nemu langkang.

Pemenang tentu udah datai ngagai kita baka gelumbang ti ngalun ngagai tebing.

Peturun kita tentu udah mayuh baka igi pasir, lalu Aku tetap udah nentuka sida enda dirusak.”

Masmur Entara: Masmur 1: 1 - 2, 3, 4 & 6

Saut (peda John 8: 12): Barang sapa nitihka Nuan, TUHAN, deka ngembuan penampak ti meri pengidup.

Ke Satu
Beberekat meh orang ti enda nitihka penemu orang ke jai,
lalu enda nitihka teladan orang ke bedosa
ti enda begulai enggau orang ke ngeleseka Allah Taala,
tang gaga ati ke Adat TUHAN,
lalu belematika Adat nya siang malam.

Saut: Barang sapa nitihka Nuan, TUHAN, deka ngembuan penampak ti meri pengidup.

Ke Dua
Orang nya baka kayu ti ditanam ba tebing sungai,
ti bebuah ninting musin
lalu daun iya nadai kala layu.
Iya mujur dalam semua utai ti dikereja iya.

Saut: Barang sapa nitihka Nuan, TUHAN, deka ngembuan penampak ti meri pengidup.

Ke Tiga
Tang orang ke jai enda baka nya.
Iya baka rumput ti rangkai ti dikebuka ribut.
Laban TUHAN deka ngintu orang ke lurus,
tang jalai pengidup orang ke jai deka dirusak.

Saut: Barang sapa nitihka Nuan, TUHAN, deka ngembuan penampak ti meri pengidup.

Alleluia
Alleluia, alleluia
TUHAN deka datai; pansut lalu betemu enggau Iya!
Iya nya meh anak raja pemaik.
Alleluia.

Bacha Injil: Matthew 11: 16 - 19

Ku Jesus bejaku ngagai orang mayuh:
“Tang baka ni ku Aku mandingka rebak ti diatu? Sida nya baka bala anak mit ke duduk di pasar, lalu bekangauka pangan diri,

‘Kami nyepu kesuling ke kita, tang kita enggai betanda! Kami bekeduie nyabak, tang kita enda ngulit!’

Laban John datai ukai deka makai ngirup; tang ku sida, ‘Iya dirasuk antu!’

Anak Mensia datai, makai ngirup, tang ku sida, ‘Peda orang nya, bam, sereta pemabuk, bepangan enggau orang ke pengumpul chukai, enggau orang ke bedosa!’

Tang penemu-dalam Allah Taala dikamatka ulih utai ti dikereja penemu-dalam nya empu.”