14 December 2019 - Hari Enam ba Minggu Kedua Musim Penatai (Adven) -->
Cari Berita

Advertisement

14 December 2019 - Hari Enam ba Minggu Kedua Musim Penatai (Adven)

Admin | beritaiban@gmail.com
December 14, 2019

Dalam Bup Kudus bisi ditulis madahka nuan deka datai baru ba maya ti udah diletak, ngambi neduhka pengeringat Allah Taala, sebedau Iya mandangka pengeringat diri. Bisi mega ditulis madahka nuan deka mai pemaik entara apai enggau anak sereta mai raban Israel badas baru. - Sirakh 48:10

Bacha Ke Satu: Sirakh 48: 1 - 4, 9 - 11

Lalu datai Nabi Elijah, siku nabi ke beapi-api.

Jaku iya baka sempun api ti mau.

Iya ngasuh penusah kebeluran lapar datai nuntung bansa iya empu.

Ketegal iya meh mayuh orang bansa sida empu merinsa dataika mimit aja ti agi idup.

Bejaku dalam nama Tuhan iya nagang ujan turun, lalu ngasuh api datai tiga kali.

Kereja ajih nuan, Nabi Elijah, chukup nyelai amat.

Nadai siku orang ulih ngaga utai baka nuan.

Nyadi nuan empu diangkat ke serega dalam ribut pulau uchung ti idup baka api ngena kereta ditarit kuda ti beapi-api.

Dalam Bup Kudus bisi ditulis madahka nuan deka datai baru ba maya ti udah diletak, ngambi neduhka pengeringat Allah Taala, sebedau Iya mandangka pengeringat diri.

Bisi mega ditulis madahka nuan deka mai pemaik entara apai enggau anak sereta mai raban Israel badas baru.

Beberekat meh orang ke ulih meda penatai nuan, lalu pia mega sida ke parai dalam pengasih, laban kitai tetap deka idup.

Masmur Entara: Masmur 80: 1AC & 2B, 14 - 15, 17 - 18

Saut (peda 3): Bai kami pulai baru, O TUHAN; ayanka pengasih Nuan ke kami, ngambika kami diidupka!

Ke Satu
Pendingka kami, O Pengibun orang Israel.
Nuan ke duduk ba kerusi diraja Nuan ari atas melikat cherub ti besayap,
pandangka pengering Nuan ngagai kami.

Saut: Bai kami pulai baru, O TUHAN; ayanka pengasih Nuan ke kami, ngambika kami diidupka!

Ke Dua
Kuingka Diri ngagai kami, O Allah Taala ti Pemadu Bekuasa!
Tilik ari serega ngagai kami di baruh ditu.
Datai lalu selamatka bala nembiak Nuan!
Datai lalu selamatka batang anggur ti udah ditanam Nuan,
batang anggur ti muda tu, ti udah diasuh Nuan kering!

Saut: Bai kami pulai baru, O TUHAN; ayanka pengasih Nuan ke kami, ngambika kami diidupka!

Ke Tiga
Ibun sereta jaga bala orang ke udah dipilih Nuan,
bansa ti udah diasuh Nuan kering.
Kami enggai agi ninggalka Nuan.
Idupka kami, lalu kami deka muji Nuan.

Saut: Bai kami pulai baru, O TUHAN; ayanka pengasih Nuan ke kami, ngambika kami diidupka!

Alleluia (peda Luke 3: 4, 6)
Alleluia, alleluia
Sediaka jalai ke Tuhan, gaga jalai Iya rurus;
lalu semua mensia deka meda pengelepas Allah Taala.
Alleluia.

Bacha Injil: Matthew 17: 9A, 10 - 13

Lebuh sida nurun ari bukit nya, sida murid lalu nanya Iya, “Nama kebuah sida pengajar Adat madahka Elijah deka dulu datai?”

Disaut Jesus, “Elijah endang amat dulu datai, lalu nyendiaka semua utai.

Tang, Aku madah ngagai kita, Elijah udah datai, lalu sida enda ngelala iya, tang merinsaka Iya sepeneka ati sida.

Baka nya mega sida deka merinsaka Anak Mensia.”

Nya baru sida murid nemu Iya bejaku ngagai sida pasal John Pemaptisa.