16 December 2019 - Hari Satu ba Minggu Ketiga Musim Penatai (Adven)
Cari Berita

Advertisement

16 December 2019 - Hari Satu ba Minggu Ketiga Musim Penatai (Adven)

Admin | beritaiban@gmail.com
December 16, 2019

Disaut Jesus, "Aku pen deka mega nanya kita siti tanya. Enti kita tesautka Aku, nya baru Aku deka madah ngagai kita kuasa ti dikena Aku ngereja utai tu. - Matthew 21:24

Bacha Ke Satu: Penyampau 24: 2 - 7, 15 - 17A

Balaam nguing tunga ngagai menua puang lalu tepedaka orang Israel diau ba kem sida beraban-raban. Roh Allah Taala lalu bekuasa ba iya, lalu iya benabi:

Tu pesan Balaam anak Beor, jaku orang ke lansik meda, ke ulih ninga utai ti disebut Allah Taala.

Aku tegenung meda utai dalam genera, genera ti datai ari Allah Taala ti Pemadu Bekuasa.

Langkau kain orang Israel amat manah,
baka rintai batang kayu engkerema tauka baka kebun ti ngimbai sungai, baka kayu garu ti ditanam TUHAN tauka baka kayu sidar ti ba tebing ai.

Hari deka ujan lebat lalu sida deka nanam benih sida ba padang ti mayuh ai.

Raja sida deka kering agi ari Agak, lalu perintah Iya deka ngerembai jauh.

Balaam lalu benabi munyi tu:
Pesan ari Balaam anak Beor, jaku ari orang siku ke lansik meda, ke ulih ninga utai ti disebut Allah Taala lalu nyambut penemu ti datai ari Iya ti Pemadu Tinggi.

Aku tegenung meda utai dalam genera, genera ti datai ari Allah Taala ti Pemadu Bekuasa.

Aku ninjau ngagai maya ti jemah ila, lalu aku tepedaka bansa orang Israel.

Siku raja, ke baka bintang ti terang, deka angkat ari bansa orang nya.

Iya deka datai ari bansa orang Israel baka bintang ti terebai.

Masmur Entara: Masmur 25: 4 - 5AB, 6 & 7BC, 8 - 9

Saut (peda 4a): Ajar aku jalai Nuan, O TUHAN.

Ke Satu
Ajar aku jalai Nuan, O TUHAN.
Awakka aku nemu jalai Nuan.
Ajar meh aku diau nitihka pemendar Nuan,
laban Nuan endang Allah Taala aku, ke ngelepaska aku.

Saut: Ajar aku jalai Nuan, O TUHAN.

Ke Dua
O TUHAN, kingatka penelap enggau pengerindu Nuan ti meruan belama iya,
ti udah diayanka Nuan kenyau ari dulu kelia.
Kingatka aku, O TUHAN, ulih pengerindu Nuan ti meruan belama iya,
enggau ulih pemadas Nuan!

Saut: Ajar aku jalai Nuan, O TUHAN.

Ke Tiga
TUHAN endang lurus sereta badas,
Iya ngajar orang ke bedosa jalai ti patut ditengah sida.
Iya nguluka orang ke baruh ati nengah jalai ti ngena
lalu ngajar sida peneka Iya.

Saut: Ajar aku jalai Nuan, O TUHAN.

Alleluia (peda Masmur 85: 7)
Alleluia, alleluia
Ayanka ngagai kami pengerindu Nuan, O TUHAN,
lalu tulung kami, selamatka kami.
Alleluia.

Bacha Injil: Matthew 21: 23 - 27

Lebuh Jesus tama ngagai Rumah Sembiang, sida tuai imam, enggau sida tuai bansa datai ngagai Iya lebuh Iya benung ngajar, lalu nanya Iya, “Kuasa apa kena Nuan ngereja utai tu, lalu sapa meri Nuan kuasa nya?”

Disaut Jesus, “Aku pen deka mega nanya kita siti tanya.

Enti kita tesautka Aku, nya baru Aku deka madah ngagai kita kuasa ti dikena Aku ngereja utai tu.

Kati pemaptisa John datai ari serega tauka ari mensia?”

Sida lalu bekelikuh enggau pangan diri.

Ku sida, “Enti kitai nyebut, ‘Ari serega,’

Iya deka nyebut ngagai kitai, ‘Enti pia, nama kebuah kita enda arapka iya?’

Tang enti kitai nyebut, ‘Ari mensia,’ kitai takutka orang mayuh, laban semua sida ngumbai John nabi.”

Nya alai sida lalu nyaut Jesus, “Enda kami nemu.”

Lalu ku Iya bejaku enggau sida, “Aku pen enggai meh madah ngagai kita kuasa ti dikena Aku ngereja utai tu.”