21 December 2019 - Hari Enam ba Minggu Ketiga Musim Penatai (Adven) -->
Cari Berita

Advertisement

21 December 2019 - Hari Enam ba Minggu Ketiga Musim Penatai (Adven)

Admin | beritaiban@gmail.com
December 21, 2019

"Beberekat meh nuan ari semua indu bukai, lalu beberekat meh anak ke dikandungka nuan!" - Luke 1:42

Bacha Ke Satu: Pelandai Solomon 2: 8 - 14

Aku bisi ninga nyawa ambai aku.

Iya datai belanda nengah bukit, belanda nengah munggu mansang ngagai aku.

Ambai aku baka kijang, baka anak rusa ti lelaki.

Nyin iya bediri ngimbai dinding. Iya nilik ke dalam ari jenila lalu nyeling ngeramas ari seling dinding.

Ambai aku bejaku enggau aku.

Datai kitu, ambai aku.

O sulu, aram mupuk enggau aku.

Musin chelap nyau abis.

Ujan udah badu.

Di menua pesisir, bungai nyau ngerembai.

Tu meh maya belagu. Lalu munyi burung achang bisi didinga di padang.

Buah ara nyau deka mansau. Angin nyau bebau rengut laban bau bungai anggur.

Nya alai, datai meh nuan ambai.

Sulu, aram mupuk enggau aku.

Nuan baka burung achang ti belalai ba selikap batu.

Awakka aku meda pemajik mua nuan lalu ninga munyi pemanah nyawa nuan.

Tauka: Sepaniah 3: 14 - 18A

Belagu lalu manjung gaga ati meh kita orang Israel! Rami gaga ati enggau pengabis ati, meh nuan Jerusalem!

TUHAN udah badu ngukum nuan.

Iya udah muai semua munsuh nuan.

TUHAN ti Raja orang Israel, bisi enggau nuan.

Nuan nadai agi kebuah takut.

Maya deka datai alai orang deka nyebut ngagai Jerusalem, “Anang takut, O Sion! Anang lembut tulang!

TUHAN Allah Taala nuan bisi enggau nuan.

Kuasa Iya ngasuh nuan menang.

TUHAN deka gaga ati ke nuan, lalu ulih pengerindu Iya, Iya deka meri nuan pengidup ti baru.

Iya deka belagu, lalu gaga ati ke nuan, baka orang ke rami gaga lebuh maya gawai.”

Masmur Entara: Masmur 33: 2 - 3, 11 - 12, 20 - 21

Saut (peda 1a;3a): Rami gaga ati meh kita ke lurus ke TUHAN. Nyanyi lagu ti baru ke Iya.

Ke Satu
Beri terima kasih ngagai TUHAN ngena belikan.
Belagu ke Iya ngena sape.
Nyanyi lagu ti baru ke Iya.
Tebah belikan enggau pengabis pengelandik kita, sereta enggau panjung kita!

Saut: Rami gaga ati meh kita ke lurus ke TUHAN. Nyanyi lagu ti baru ke Iya.

Ke Dua
Tang pelan Iya Empu tan belama iya.
Juluk ati Iya meruan belama iya.
Lantang meh bansa ti ngaku TUHAN nyadika Allah Taala sida.
Beberekat meh orang ke udah dipilih TUHAN nyadika nembiak Iya!

Saut: Rami gaga ati meh kita ke lurus ke TUHAN. Nyanyi lagu ti baru ke Iya.

Ke Tiga
Kitai andal ati ke TUHAN.
Iya nyaga sereta nyaup kitai.
Kitai gaga ati ketegal Iya.
Kitai manggaika pengarap kitai ba nama Iya ti kudus.

Saut: Rami gaga ati meh kita ke lurus ke TUHAN. Nyanyi lagu ti baru ke Iya.

Alleluia
Alleluia, alleluia
O Imanuel, Raja enggau Pemerintah kami:
datai lalu selamatka kami, TUHAN Allah Taala kami.
Alleluia.

Bacha Injil: Luke 1: 39 - 45

Maria angkat lalu beguai-guai mupuk ngagai sebuah nengeri di menua Judah ti bebukit, tama ngagai rumah Sekariah, lalu meri tabi basa ngagai Elisabet.

Lebuh Elisabet ninga jaku tabi Maria, anak mit ti dalam kandung Elisabet lalu engkebut.

Penuh laban Roh Kudus, Elisabet lalu bejaku enggau nyawa ti inggar,

“Beberekat meh nuan ari semua indu bukai, lalu beberekat meh anak ke dikandungka nuan!

Lalu nama kebuah utai tu nyadi ba aku, datai ke indai Tuhan aku nyau nemuai ngagai aku?

Laban lebuh aku ninga jaku tabi nuan tadi, anak mit ke dalam kandung aku engkebut gaga ati.

Beberekat meh iya ke arapka jaku Tuhan deka dikamatka!”