22 December 2019 - Hari Minggu Ke-empat Musim Penatai (Adven) -->
Cari Berita

Advertisement

22 December 2019 - Hari Minggu Ke-empat Musim Penatai (Adven)

Admin | beritaiban@gmail.com
December 22, 2019

Awakka Allah Taala ti Apai kitai enggau Tuhan Jesus Kristus meri kita pengasih enggau pemaik. - Rome 1:7

Bacha Ke Satu: Isaiah 7: 10 - 14

TUHAN ngirumka siti agi pesan ngagai Ahas:

“Pinta siti tanda ari TUHAN Allah Taala nuan.

Nuan tau minta tanda nya datai ari buntut dunya pemati, tauka ari endur ti tinggi di serega.”

Disaut Ahas, “Aku enggai minta tanda, laban aku enggai nguji TUHAN.”

Isaiah lalu nyaut, “Pendingka diatu, kita ke peturun Raja David.

Kita udah ngabas pengeliat ati mensia.

Kati kita deka mega ngabas pengeliat ati Allah Taala?

Diatu TUHAN Empu deka meri kita siti tanda: siku indu dara deka ngandung lalu ngadaka anak lelaki siku, lalu iya deka meri anak mit nya nama ‘Imanuel.’

Masmur Entara: Masmur 24: 1 - 2, 3 - 4, 5 - 6

Saut (peda 7 & 10): Awakka TUHAN tama; Iya nya meh Raja ke bemulia!

Ke Satu
Dunya enggau semua utai ti dalam dunya endang enggi TUHAN.
Dunya enggau semua orang ke diau di dunya endang enggi TUHAN;
laban Iya udah nudukka dunya ba tasik enggau ba sungai.

Saut: Awakka TUHAN tama; Iya nya meh Raja ke bemulia!

Ke Dua
Sapa tau niki ngagai bukit TUHAN?
Sapa tau bediri dalam Rumah Sembiang Iya ti kudus?
Orang ke tuchi jari, tuchi ati, ti enda nyembah engkeramba lalu enda ngaga semaya ti bula.

Saut: Awakka TUHAN tama; Iya nya meh Raja ke bemulia!

Ke Tiga
TUHAN deka merekat lalu ngidupka sida.
Allah Taala ke meri sida pengelepas, deka ngumbai sida nadai penyalah.
Nya meh orang ke ngiga Iya, ke ngiga Allah Taala Jakop.

Saut: Awakka TUHAN tama; Iya nya meh Raja ke bemulia!

Bacha Ke Dua: Rome 1: 1 - 7

Surat ari Paul, ulun Jesus Kristus, ke dikangauka nyadi rasul, lalu dilih nusui Berita Manah Allah Taala, ti udah disemaya Allah Taala dulu kelia nengah sida nabi Iya, dalam Bup Kudus, iya nya Berita Manah pasal Anak Iya, ke ada nyadi mensia ari peturun David; lalu dikumbai Anak Allah Taala ulih Roh pengudus, laban pengangkat Jesus Kristus Tuhan kitai ari mati.

Ulih Iya, Allah Taala udah meri kami pengasih enggau pengawa nyadi rasul mai semua orang bansa bukai arap sereta ngasika nama Iya, nyengkaum kita ke dikangauka nyadi nembiak Jesus Kristus.

Ngagai semua kita ke dikerinduka Allah Taala di Rome, ke udah dikangauka nyadi nembiak Tuhan:

Awakka Allah Taala ti Apai kitai enggau Tuhan Jesus Kristus meri kita pengasih enggau pemaik.

Alleluia (Matthew 1: 23)

Alleluia, alleluia
Siku dara bungas deka betubuh-bisi, lalu ngadaka anak lelaki siku,
lalu iya deka dikumbai Imanuel.
Alleluia.

Bacha Injil: Matthew 1: 18 - 24

Baka tu ku gaya pengada Jesus Kristus.

Indai Iya Maria udah betunang enggau Josep, tang sebedau seduai iya jadi melaki-bini, iya betubuh-bisi ulih kuasa Roh Kudus.

Laban tunang iya, Josep, endang orang ke lurus, lalu enggai ngemaluka Maria di mua orang mayuh, nya alai iya berunding deka muai Maria ngena chara belalai.

Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

Iya deka ngadaka anak lelaki siku, lalu nuan deka meri Iya nama Jesus, laban Iya deka nyelamatka nembiak Iya ari dosa sida.”

Semua utai tu nyadi kena ngamatka jaku ti udah disebut Tuhan beseruanka siku nabi,
“Siku dara bungas deka betubuh-bisi, lalu ngadaka anak lelaki siku, lalu iya deka dikumbai Imanuel” (reti nya, “Allah Taala enggau kitai”).

Lebuh Josep dani, iya lalu nitihka jaku melikat Tuhan. Iya jadi enggau Maria.