Aku nganti anak aku ngambi aku ditu..
Cari Berita

Advertisement

Aku nganti anak aku ngambi aku ditu..

Admin | beritaiban@gmail.com
December 12, 2019

SERURAN NGANTI: Kemaya meh nuan ngambi aku pulai anak?

MIRI: Siti artikel ke dipansutka siku lelaki ba dalam Facebook Group 'Sarawak Info' bebali nyadi chapuh (viral), tengahari kemari.

Ba artikel nya, mantaika penusah ke ditapi siku lelaki ke dikelala ngena nama Christopher Langi, 59 taun, orang ari Bekenu.

Raban beritaiban.com sempat interbieu orang ke mansutka artikel nya, Bonny, orang Selangau.

"Kemari aku betemu enggau apai tuai nya. Aku kasih meda iya digaga bala anak iya baka nya.

"Kasih amat aku meda iya.. Apai tuai nya enda meruan makai enggau tinduk..

"Belika aku asi enggau bisi mega aku meri iya duit belanja mimit iya tadi.

"Ka meri mayuh enda ga ulih laban aku ukai orang pemisi.

"Ka baie aku pulai enggau bini aku pulai ke rumah iya tang iya enggai laban iya agi nganti bala anak iya ngambi iya ba Mosjaya, Miri, ditu," ku Bonny lebuh dirandau pengarang berita.

Asai ke dipandam dada enggau enda berasai ai mata admin neritik naya enggai bebadu pengudah nemu penusah ke ditapi apai tuai nya.

Laban ke agi mayuh utai ditanya admin ba Bonny tang enda entu ulih disaut iya.

Nangkan ke nya, Bonny mansang baru ngagai endur apai tuai nya baru.

Puji Tuhan! Admin empu ulih interbieu apai tuai nya ngena talipaun binching Bonny.

"Aku udah sarak enggau bini aku, bisi tiga iku anak aku ba Miri ditu.

"Siku udah betemu enggau aku ditu, nya aku nganti iya ditu..

"Sebedau aku kena sakit 'strok', aku kereja konterik. Aku mindah endur diau nitihka endur kami kereja.

"Aku enda ulih ngena bas laban mata aku enda entu meda. Nya alai, aku nganti anak aku ke benama Tony nya, ditu," ku iya lebuh dirandau pengarang berita, malam tadi.

Berebak enggau tu, kami ari raban Berita Iban Online ngarapka anak iya Tony ulih ngabas tauka ngambi iya enggau naka pengelengkas.

AMBI AKU ANAK: Tinduk ba kaki lima nganti penatai anak ke disayauka iya.

Ambi pulai apai nuan Tony, kasih iya nadai endur ngenduh. Tinduk semina  pan enda beantapka pelestik 'banner', bepanggalka kantung sandik mit enggau nadai bepuak.

Tambah mega baka bulan tu, musin ujan diatu.. Kada iya nakal tinduk chelap enggau empa nyamuk b sebelah tubuh.

Ambi iya Tony... Kasihka apai nuan..

Aram kitai sama bela besadungka artikel tu ngambika Tony ulih nemu apai iya benung tasah enggau seruran nganti penatai iya.. Tuhan merekat semua 😇