Kini nuan ka lari 'Pak cik'
Cari Berita

Advertisement

Kini nuan ka lari 'Pak cik'

Admin | beritaiban@gmail.com
December 8, 2019

NYA GAMAL IYA: Ngelala orang ke nama 'Pak cik' tu kita?

KUCHING: Raban polis benung ngiga siku lelaki ke dikelala ngena nama 'Pak cik' kena mantu mansik kes munuh siku lelaki Indonesia.

Nitihka penerang ke diterima beritaiban.com, lelaki Indon nya ditemu parai ba semak sebuah rumah di kebun sawit, Kampung Abit, Serian, kena Hari Empat tu tadi.

Chief Polis Pampang Serian, DSP Aswandy Anis madah, orang ke ngelala saspek nya taueri penerang ngagai Pemesai Pengawa Mansik kes nya, ASP Alias Nen, ngena lumur talipaun 016-8830433 tauka ngaga ripot ngagai balai polis kesemak. 

"Naka kediatu, saspek semina dikelala ngena nama kangau 'Pak cik'," ku iya lebuh dirandau pengarang berita sehari tu tadi.

Sebedau tu, Aswandy madahka raban polis bisi nerima ripot ari genturung pendiau Abit bekait enggau bisi bangkai siku lelaki orang Indon, 27 taun, ditemu urung jam 3 lemai.

"Ba ripot ke diterima polis, madahka bisi nemu bangkai siku lelaki benung tegali enggau dibalut darah ba kebun sawit di Kampung Abit.

"Genturung pendiau menua nya pechaya lelaki ke parai nya orang Indon pengudah tetemuka kantung sandik ke diempu iya urung penyauh 34 kaki ari endur iya ke parai," ku iya. 

"Raban polis mega bisi datai enggau bejalaika pengawa mansik ba palan penusah nyadi.

"Bangkai lelaki Indon nya dianjung ke Sepital Serian kena bejalaika pengawa buntas tasat.

"Taja pia, pansik silik agi dipejalaika kena nemu nama kebuah penusah nyadi enggau sapa ke munuh lelaki Indon nya," tandu iya.

Kes nya dipansik ari baruh Seksyen 302 Kanun Keseksaan.