Siku lelaki ditemu parai dalam bilik suwa di Kuching
Cari Berita

Advertisement

Siku lelaki ditemu parai dalam bilik suwa di Kuching

Frankie John™
December 4, 2019

PICHA PENGIAS: Bangkai siku lelaki benung gali telentang.

KUCHING: Siku lelaki ditemu parai ba dalam bilik suwa iya di Bandar Baharu Batu Kawa (MJC), ditu, urung jam 10 pagi tu tadi.

Nitihka penerang ke diterima beritaiban.com, lelaki nya dikelala ngena nama Selvakumar Subramaniam, 31 taun, orang ari Jerantut, Pahang ditemu menyadi tuai iya (abang) pengudah Selvakumar nadai nyaut lebuh ke dikanggauka iya.

Nitihka penerang, abang Selvakumar udah nguji nganggauka iya beberapa kali ari luar bilik suwa nya tang nadai disaut iya.

"Ketegal irauka pengelikun menyadi iya (Selvakumar), dia abang iya mutus ati ngerumpang pintu tama bilik suwa nya enggau tepedaka iya (Selvakumar) benung enda nemu diri.

"Selvakumar dipeda abang iya benung gali telentang enggau enda nemu diri (enda ngeleda) ba dalam bilik suwa nya.

"Pengudah nya, abang Selvakumar lalu betalipaun ngagai ambulan ngambika ulih nyelamatka menyadi iya nya.

"Tang taja pia, raban paramedik ari Sepita Besai Sarawak (HUS) ke datai ngesah ke palan penusah nyadi madahka Selvakumar udah nadai tauka enda ulih diselamatka agi," ku orang ke meri penerang.

Bisi beberapa iku raban polis ari Opis Polis Pampang (IPD) Padawan mega datai ngesah ke palan penusah nyadi laban deka bejalaika pengawa mansik kes nya.

"Asil peresa raban polis ba palan penusah ke nyadi, sida iya bisi tetemuka racun indu utai.

"Tang apin temu enti nyema racun indu nya bisi bekait enggau kes tu tauka enda. Kebuah iya parai agi dipansik polis.

"Bangkai Selvakumar udah dianjung ke Sepital Besai Sarawak (HUS) enggau pengawa buntas tasat deka dipejalaika pagila," ku iya.

Niang Selvakumar anak ke lumur tiga ari enam iku diri menyadi enggau baru datai ba MJC urung pengelama tiga minggu.