25 April 2020 - Hari Enam ba Minggu Kedua Musim Paska (Feast of Saint Mark, Evangelist) -->
Cari Berita

Advertisement

25 April 2020 - Hari Enam ba Minggu Kedua Musim Paska (Feast of Saint Mark, Evangelist)

Admin | beritaiban@gmail.com
April 25, 2020

“Bejalai kita ngagai serata dunya, lalu tusui Berita Manah ngagai semua mensia.” -Mark 16-15

Selamat pagi, Hari Enam ba Minggu Kedua Musim Paska (Feast of Saint Mark, Evangelist) ngagai semua bala menyadi dalam kristus. Aram kitai sama nyendiaka diri lalu belabuh besembiang:

Bacha Ke Satu: 1 Peter 5: 5B - 14

Lalu semua kita enda tau enda baruh ati lebuh kita begulai enggau pangan diri, laban “Allah Taala ngelaban orang ke sumbung, tang ngayanka pengasih ngagai orang ke baruh ati.”

Nya alai, diau enggau ati ti baruh, di baruh jari Allah Taala ti bekuasa, ngambika Iya ngangkatka kita tinggi ba maya ti patut.

Serahka semua pengirau kita ngagai Iya, laban Iya ngibun kita.

Disiplin diri empu sereta bejaga! Sitan ti munsuh kita bejalai segau-segau baka singa ti negung, begigaka orang ke deka diempa iya.

Laban meh Sitan, bediri tegap dalam pengarap, laban kita nemu, semua orang bukai ke arap di serata dunya tu sama natka pemerinsa nya baka kita.

Lalu lebuh kita udah natka pemerinsa nya enda lama, Allah Taala ti pun semua pengasih, ti udah ngangauka kita ngagai mulia Iya ti meruan belama iya dalam Kristus, deka ngaga kita nyadi baru, ngering sereta negapka kita.

Awakka Iya bempu kuasa belama-lama iya! Amin.

Silas, menyadi aku ke tetap ati, udah nulung aku nulis surat ti pandak tu ngagai kita kena aku meransang kita sereta madahka ngagai kita pengasih Allah Taala ti bendar.

Bediri tegap dalam pengasih nya.

Menyadi kita ke di Babilon, ke udah dipilih baka kita empu, ngirumka tabi basa ngagai kita, lalu baka nya mega anak aku Mark.

Beri tabi basa ngagai pangan diri ngena pengerindu orang Kristian.

Awakka pemaik meruan enggau semua kita ke nembiak Kristus.

Masmur Entara: Masmur 89: 1 - 2, 5 - 6, 15 - 16

Saut (peda 1): O TUHAN, aku deka seruran belagu ngenang pengerindu Nuan ti meruan belama iya.

Ke Satu
O TUHAN, aku deka seruran belagu
ngenang pengerindu Nuan ti meruan belama iya.
Aku deka madahka penetap ati Nuan belama iya.
Aku nemu pengerindu Nuan deka meruan belama iya,
lalu penetap ati Nuan deka meruan baka langit.

Saut: O TUHAN, aku deka seruran belagu ngenang pengerindu Nuan ti meruan belama iya.

Ke Dua
Serega belagu muji pemanah utai ti dikereja Nuan.
Sida ke kudus belagu muji penetap ati Nuan, O TUHAN.
Nadai orang di langit sebaka enggau Nuan, O TUHAN.
Nadai orang di serega sebaka enggau Nuan.

Saut: O TUHAN, aku deka seruran belagu ngenang pengerindu Nuan ti meruan belama iya.

Ke Tiga
Beberekat meh orang ke nyembah Nuan ngena lagu,
orang ke diau dalam penampak penelap Nuan!
Sida rami gaga sepemanjai hari ketegal Nuan,
lalu sida muji Nuan ketegal pemadas Nuan.

Saut: O TUHAN, aku deka seruran belagu ngenang pengerindu Nuan ti meruan belama iya.

Alleluia (peda 1 Korint 1: 23A & 24B):

Alleluia, alleluia.
Kami nusui pasal Kristus ke diregang;
Iya nya kuasa enggau penemu-dalam Allah Taala.
Alleluia.

Bacha Injil: Mark 16: 15 - 20

15 Lalu ku Iya bejaku ngagai sida, "Bejalai kita ngagai serata dunya, lalu tusui Berita Manah ngagai semua mensia.

16 Orang ke arap lalu dibaptisa, deka diselamatka, tang orang ke enda arap deka diukum.

17 Lalu tu tanda ti deka nyempulang orang ke arap: sida deka muru antu dalam nama Aku; sida deka bejaku ngena jaku ti nyelai.

18 Enti sida tepegaika ular, tauka teirupka rachun, utai nya enda ngemediska sida; sida deka ngengkahka jari sida ba orang ke sakit, lalu orang nya deka gerai." Jesus Niki Ke Serega

19 Lebuh Tuhan Jesus udah bejaku ngagai sida, Iya lalu dibai niki ke serega, lalu duduk muak ari kanan Allah Taala.

20 Sida murid bejalai lalu nusui Berita Manah di semua endur, lalu Tuhan bekereja enggau sida lalu netapka pengamat pesan Iya ngena kereja ajih ti nyempulang pesan nya.