4 April 2020 - Hari Enam ba Minggu Kelima Musim Lent -->
Cari Berita

Advertisement

4 April 2020 - Hari Enam ba Minggu Kelima Musim Lent

Admin | beritaiban@gmail.com
April 4, 2020

"Aku deka ngaga siti sempekat enggau sida kena nyamin pengelikun sida belama iya. Aku deka ngentapka sida diau dia, lalu nambahka pemayuh tubuh sida, lalu netapka Rumah Aku bediri belama iya di menua sida." -Esekiel 37:26

Selamat pagi Hari Enam (4 April 2020) ba Minggu Kelima Musim Lent ngagai semua menyadi dalam Kristus.


Bacha Ke Satu: Esekiel 37: 21 - 28


Ku TUHAN bejaku ngagai aku baru:

21 Udah nya padahka ngagai sida, Aku TUHAN Allah Taala deka ngambi semua nembiak Aku ari semua menua ti udah alai sida pambar, ngempuruka sida, lalu mai sida pulai baru ngagai menua sida empu.

22 Aku deka ngempung sida nyadi siti bansa di menua tu, ba bukit ti di menua Israel.

Sida deka bisi siku aja raja merintah sida, lalu sida enda agi dibagi ngagai dua bengkah bansa, tauka belah dua nyadi dua bengkah perintah.

23 Sida enda agi ngamahka diri ngena engkeramba, tauka ngamahka diri ngena dosa.

Aku deka ngelepaska sida ari semua jalai ti dikena sida bedosa, ti nyual Aku.

Aku deka nuchi sida.

Sida deka nyadi nembiak Aku, lalu Aku deka nyadi Allah Taala sida.

24 Siku raja ke sebaka enggau nembiak Aku David deka nyadika raja sida.

Semua sida deka begempung di baruh siku raja nya lalu sida deka, enggau ati ti tetap, ngasika Adat Aku.

25 Sida deka diau di menua ti udah diberi Aku ngagai nembiak Aku Jakop, menua ti udah endur alai bala aki ini sida diau menya.

Sida deka diau dia belama iya, lalu baka nya mega bala anak enggau peturun sida.

Siku raja ke sebaka enggau nembiak Aku David deka merintah sida belama iya.

26 Aku deka ngaga siti sempekat enggau sida kena nyamin pengelikun sida belama iya.

Aku deka ngentapka sida diau dia, lalu nambahka pemayuh tubuh sida, lalu netapka Rumah Aku bediri belama iya di menua sida.

27 Aku deka diau dia begulai enggau sida.

Aku deka nyadi Allah Taala sida, lalu sida deka nyadi nembiak Aku.

28 Lebuh Aku nirika Rumah Aku dia ba tengah-tengah sida belama iya, nya baru semua bansa deka nemu Aku ti TUHAN udah milih orang Israel nyadika nembiak Aku.”


Masmur Entara: Jeremiah 31: 10, 11 - 12ABCD, 13


Saut (peda 10d): TUHAN deka nyaga kitai, baka pengibun bedus ke nyaga raban bedus iya.

Ke Satu
Pendingka Aku, semua kita bansa bukai,
lalu padahka jaku Aku di seberai tasik.
Aku udah ngachirka bala nembiak Aku,
tang Aku deka ngempuruka sida baru lalu nyaga sida baka pengibun bedus ke nyaga raban bedus iya.

Saut: TUHAN deka nyaga kitai, baka pengibun bedus ke nyaga raban bedus iya.

Ke Dua
Aku udah nebus orang Israel lalu udah nebus sida ari siti bansa ti kering.

Sida deka datai lalu belagu gaga ati ba Bukit Sion lalu deka gaga ke pemeri Aku, iya nya gandum, enggau wain, enggau minyak kana, bedus enggau sapi.

Saut: TUHAN deka nyaga kitai, baka pengibun bedus ke nyaga raban bedus iya.

Ke Tiga
Udah nya sida indu ke agi biak, deka betanda sereta lantang ati lalu sida ke lelaki, ke biak enggau ke tuai, deka rami gaga.

Aku deka merindang sida, lalu nukar ulit sida nyadi pengaga, ngubah ati sida ke balat tusah nyadi lantang.

Saut: TUHAN deka nyaga kitai, baka pengibun bedus ke nyaga raban bedus iya.

Aklamasi sebedau Injil (peda Esekiel 18: 31):

Lengkaka semua penyai ti benung dikereja kita, ku TUHAN, lalu awakka runding enggau ati kita digaga nyadi baru.


Bacha Injil: John 11: 45 - 56


45 Nya alai, mayuh orang Judah ke udah datai enggau Maria, lalu udah meda utai ti dikereja Jesus, arapka Iya.

46 Tang sekeda sida mansang ngagai orang Parisi, lalu madahka utai ti udah dikereja Iya.

47 Nya alai sida tuai imam enggau orang Parisi lalu mai raban Kunsil baum, lalu bejaku, “Nama utai ti patut dikereja kitai? Orang tu ngereja mayuh kereja ajih.

48 Enti kitai nejuka Iya majak ngereja nya, semua orang deka arapka Iya, lalu orang Rome deka datai lalu ngerusak Rumah Sembiang enggau bansa kitai.”

49 Tang siku ari bala sida, ke benama Kaiapas, ke nyadi imam besai taun nya, lalu bejaku ngagai sida, “Kita nadai nemu utai!

50 Kita enda nemu, manah agi enti siku orang mati ngarika orang mayuh, ari ke nejuka semua bansa kitai dirusak.”

51 Kaiapas ukai nyebut nya ari peneka iya empu, tang laban iya nyadi imam besai taun nya, iya benabi madahka Jesus deka mati ngarika bansa orang Judah,

52 lalu ukai semina ke bansa orang Judah aja, tang kena ngempuruka semua nembiak Allah Taala ke ngachir pendiau.

53 Nya alai berengkah ari nya, sida lalu bekira deka munuh Iya.

54 Nya alai Jesus enda agi ngayanka Diri begulai enggau orang Judah, tang mupuk ari nya ngagai nengeri Epraim ba menua ti semak menua puang, lalu diau dia enggau sida murid Iya.

55 Nyadi Gawai Paska nyau semak, lalu mayuh orang datai ari menua pesisir ngagai Jerusalem, deka nuchi diri sebedau Gawai Paska.

56 Sida begigaka Jesus, lalu bejaku enggau pangan diri lebuh sida bediri dalam Rumah Sembiang, “Nama runding kita? Kati Iya deka datai ngagai Gawai tu?”


BERUNDINGKA INJIL SEHARI TU:


Dalam injil seharitu Jesus enda didawa ngereja penyai, tang dikumbai ngereja pengawa ti manah.

Pengawa ti manah ti dikereja Jesus ditusi sida sekali tu pasal iya ti udah ngangkatka Lasarus idup baru.

Enggau nya, Jesus majak tebilang manah nama tampak rita.

Sida tuai imam sepatut iya gaga ninga pemanah utai ti dikereja Jesus enti enda ketegal sida salah penemu pasal iya.

Nya alai ari ti gagaka iya, ati sida nyau majak irau-seirau enggaika ketegal mayuh orang nitihka Jesus, orang Rome deka ngenusahka sida.

Ba penemu Kaiapas, Jesus patut parai ngambika sida enda tusah laban orang Rome.

Siti penemu ti ngambi jalai muntang, sanggup ngayah, ngemedis sampaika sanggup munuh orang ti nadai penyalah, ketegal ngira diri empu aja, ngambika diri empu selamat.

Ba Jesus, iya nerima pemarai kena nyelamatka semua mensia.

Iya enggau ati rindu meri nyawa diri nyadika siti pemeri ngambika kitai tau bulih selamat laban juluk ati iya ngempuruka semua nembiak Allah Taala ti udah pambar pepar.

Enti bisi orang tusah nyau berasai lantang ketegal kitai meri diri nyadika pemeri ngagai iya, kati ku nya enda dikumbai saum mission enggau Tuhan Jesus?


ARAM KITAI SAMA BESAMPI:


Tuhan Jesus, terima kasih ke teladan diberi nuan kena ngajar kami.

Dalam pengidup nuan, nuan endang semampai meri diri nyadi pemeri ti ngasuh orang senang lantang, gerai nyamai.

Nuan sampai meri nyawa diri ba regang ngambika kami tau ulih ngasaika pengelantang ti meruan belama iya ila.

Asuh aku Tuhan baka nuan, enda ngira diri empu aja, tang nyadi siti pemeri ti mai orang ngasaika pengerindu nuan ngambika nuan tampak rita tebilang nama. Amen. 🙏