5 lelaki enda dapat lari ditan polis, nyabung manuk di Jalai Ulu Bayan -->
Cari Berita

Advertisement

5 lelaki enda dapat lari ditan polis, nyabung manuk di Jalai Ulu Bayan

Admin | beritaiban@gmail.com
April 8, 2020

NAMA PENYADI: Sida iya lima (suspek) dibai ke IPD Mukah.

MUKAH: Lima lelaki benung chapuh ngemataka manuk bebintis di Jalai Ulu Bayan, ditan polis ketegal enda nitih Atur Mindah Besekat (PKP), lemai kemari.

Chief Polis Pelilih Mukah, Deputi Superintenden Jimmy Panyau madah semua sida lima lelaki nya (suspek) ditan lebuh raban polis bejalaika Op COVID-19 ba palan sida ke nyabung nya urung jam 3.10 lemai.

Ku iya, lebuh raban polis nyubuk enggau ngaga abas ngenyit ba palan sida ke nyabung.

"Dia sida iya lalu bekesebar nguji ngelarika diri laban deka nyeliahka diri ari kena tangkap.

"Taja pia, lima lelaki beumur antara 53 nyentuk 71 taun mujur ditangkap polis ketegal enda dapat ngelarika diri," ku iya madahka pengarang berita, kemari.

Ku Jimmy, asil pansik tanya saut sida iya lima nemu pasal Atur Mindah Besekat (PKP).

"Sida iya lima madahka diri enda tan diau  di rumah. Nya alai sida iya nurun nyabung," ku iya.

"Raban polis mega mujur ngerampas tiga iku manuk sabung idup, siku manuk sabung parai enggau mayuh macham bengkah perengka ke dikena iya nyabung.

"Sida iya lima dibai ke Balai Polis (IPD) Mukah laban deka dipansik enggau silik agi.

Berebak enggau nya, Jimmy mega meri jaku tagang ngagai peranak menua ba pelilih Mukah ngambika diau ba rumah aja sepemanjai timpuh Atur Mindah Besekat (PKP).

"Tau enda ibuh pansut ari rumah enti nadai kebuah ti berat tauka anang ngelaban Atur Mindah Besekat (PKP).

"Barang sapa ke ngelaban Atur PKP deka ditinggang ukum ti berat," tandu iya.

Kes dipansik ari baruh "Seksyen 3(1) Langkah-Langkah Pencegahan dan Penganiayaan Terhadap Binatang 1962 dan Seksyen 11(1), Peraturan-Peraturan Pencegahan dan Pengawalan Penyakit Berjangkit (Langkah-langkah Di Dalam Kawasan Tempatan Jangkitan) 2020."