6 April 2020 - Hari Satu ba Minggu Kudus -->
Cari Berita

Advertisement

6 April 2020 - Hari Satu ba Minggu Kudus

Admin | beritaiban@gmail.com
April 6, 2020

 “Enti aku enda masu nuan, nuan nadai ungkup ba aku.” -John 13:8

Selamat pagi Hari Satu ba Minggu Kudus ngagai semua menyadi dalam Kristus. Aram sembiang kitai:


Bacha Ke Satu: Isaiah 42: 1 - 7


1 Ku TUHAN bejaku,

“Tu nembiak Aku, ke diberi Aku pengering, ti udah dipilih Aku, sereta dikerinduka Aku.

Aku udah ngisi iya enggau Roh Aku, lalu iya deka mai atur ti lurus ngagai genap bengkah bansa.

2 Iya enda manjung tauka merakka nyawa iya tauka bejaku enggau nyawa ti inggar ba sebelah jalai raya.

3 Iya enggai matahka buluh ti melepi tauka madamka lampu ti kelap-kelap.

Iya tetap deka mai atur ti lurus ngagai semua mensia.

4 Iya deka mengkang andal ati sereta enda lemi semengat.

Iya deka numbuhka atur ti lurus di dunya tu.

Menua ti ba tebing tasik deka gagit ati nganti ajar ari iya.”

5 TUHAN Allah Taala ngaga lalu mintarka langit. Iya nempa dunya, enggau semua utai ti idup dia. Iya meri pengidup enggau seput ngagai semua mensia di dunya tu.

Lalu diatu TUHAN Allah Taala bejaku ngagai nembiak Iya,

6 “Aku ti TUHAN udah ngangauka nuan lalu meri nuan kuasa nentuka atur ti lurus dipejalaika di dunya.

Ulih nuan, Aku deka ngaga siti sempekat enggau semua mensia.

Ulih nuan, Aku deka mai penampak ngagai semua bansa.

7 Nuan deka menchelakka mata orang ke buta lalu ngelepaska orang ari rumah jil.”


Masmur Entara: Masmur 27: 1, 2, 3, 13 - 14


Saut (peda 1a): TUHAN meh penampak enggau pengelepas aku.

Ke Satu
TUHAN meh penampak enggau pengelepas aku.
Aku enda takut.
TUHAN nyadika kuta nyawa aku;
nya alai aku enda takut.

Saut: TUHAN meh penampak enggau pengelepas aku.

Ke Dua
Lebuh orang ke jai ngamuk aku,
deka makai aku,
iya nya bala munsuh aku,
sida deka tesangkut lalu rebah.

Saut: TUHAN meh penampak enggau pengelepas aku.

Ke Tiga
Taja pen semua bala soldadu ngelulung aku,
aku enda takut.
Taja pen munsuh nyerang aku,
aku deka mengkang berani.

Saut: TUHAN meh penampak enggau pengelepas aku.

Ke Empat
Aku nemu diri deka idup lalu meda pemadas TUHAN dalam pengidup tu.
Panggaika pengarap ba TUHAN.
Kering sereta berani;
Panggaika pengarap ba TUHAN.

Saut: TUHAN meh penampak enggau pengelepas aku.

Aklamasi sebedau Injil:

Tabi ka nuan, Raja kami;
semina nuan aja ti bisi penyiru ke kami ti bepenyalah.


Bacha Injil: John 12: 1 - 11


1 Enam hari sebedau Gawai Paska, Jesus datai di Betani, endur alai Lasarus diau, orang ke udah diangkatka Jesus ari mati.

2 Dia sida nyendiaka makai lemai ke Jesus. Marta mela pemakai, lalu Lasarus bisi enggau orang ba mija nya enggau Jesus.

3 Maria lalu ngambi sebutul minyak wangi ti berega, ti digaga ari narwasti ti tulin, nata kaki Jesus, lalu ngendas kaki Jesus ngena buk iya.

Bau rengut minyak nya nyau bealun-alun dalam rumah nya.

4 Tang Judas Iskariot, siku ari murid Iya, ke deka nyual Iya, bejaku,

5 “Nama kebuah minyak wangi nya enda dijual ngena rega tiga ratus singkap duit pirak lalu duit nya diberi ngagai orang ke seranta?”

6 (Iya nyebut nya, ukai laban iya ibuhka orang ke seranta, tang laban iya penchuri.

Iya nyaga sarang duit sida, lalu iya selalu ngenchuri duit ari sarang duit nya.)

7 Jesus lalu bejaku, “Anang ngachau iya! Iya meli minyak nya ngambika iya nyimpan minyak nya kena nyendiaka aku dikubur.

8 Kita seruran bisi orang ke seranta enggau kita, tang aku enda seruran enggau kita.”

9 Lebuh bala orang Judah ninga Jesus bisi dia, sida lalu mansang kia, ukai semina ketegal Jesus, tang laban sida deka meda Lasarus, ke udah diangkatka iya ari mati.

10 Nya alai bala tuai imam mega ngiga jalai munuh Lasarus, 11 laban ketegal iya mayuh orang Judah ninggalka sida, lalu arapka Jesus.


Berundingka injil sehari tu:


Maria NEGU kaki Jesus lebuh iya nata minyak ba kaki Jesus, lalu ngendas kaki Jesus ngena buk iya, baka Jesus ti NEGU kaki sida murid iya lebuh iya masu kaki sida.

Lebuh Maria nata kaki Jesus ngena minyak, ku Jesus, “Aku enda seruran enggau kita.”

Enggau jaku nya Jesus madahka diri deka pulai ngagai Apai, lalu nadai dipeda agi enggau sida.

Lalu udah nya, ba maya bukai, lebuh Peter enggai ngasuh Jesus masu kaki iya,

ku Jesus, “Enti aku enda masu nuan, nuan nadai ungkup ba aku.” -John 13:8

Enggau jaku nya, Jesus madah ngagai Peter, enti iya enggai dibasu Jesus kaki, ila iya mega enggai masu kaki orang.

Tuku nya, enti iya enggai ‘masu kaki’ orang, iya enda ukai murid Jesus.

Ari dua bengkah utai ti nyadi nya, Jesus ngajar kitai siti utai ti mesti dikereja kitai ti nembiak iya,  iya nya: mela pangan diri, ari siku ngagai siku, baka iya ti mela lebuh bejalai ngerembaika berita manah pasal Perintah Allah Taala.

Jesus dekaka kitai nemu, ari kitai ti mela pangan diri, kitai ngaku diri enggi pangan diri.

Nya baru kitai amat dikumbai Tubuh Kristus, laban dalam siti tubuh mayuh perengka, lalu tiap perengka bela mela pangan diri ngambika tubuh nya meruan idup.

Pesan tu besai reti bendar ba dunya rebak diatu laban mensia mayuh nyau bisi pelan kediri empu ti enda sebaka ari enggi Kristus.

Pelan ti nitihka peneka diri empu ngena jalai aum: enti nuan mela aku, aku mela nuan.

Jesus minta kitai nyadi pemela pangan diri, ukai ngelaban diri sama diri.


Aram kitai sama bela besampi:


Tuhan Jesus, terima kasih ke ajar Nuan sehari tu.

Aku minta ampun laban suah enda nitihka padah Nuan.

Beri aku ati baka enggi Nuan ngambika aku baka perengka ba siti tubuh ti barang maya deka mela awakka tubuh meruan idup.

Amen 🙏



Tau sadung ngagai bala pangan nuan ngambika sida ulih enggau kitai sama besembiang tauka meri puji ngagai Apai kitai ti di serega. Tuhan merekat semua 😇