6 pelajar Sarawak positif COVID-19, pulai ari Indonesia -->
Cari Berita

Advertisement

6 pelajar Sarawak positif COVID-19, pulai ari Indonesia

Admin | beritaiban@gmail.com
April 25, 2020

APIN LAMA UDAH DATAI: Pelajar Sarawak ti nyambung belajar ba menua luar baru sangkai di Airport Kuching, kemari. 

KUCHING: Perintah Sarawak bejalaika atur ti chukup terit ngagai semua orang nyengkaum bala nembiak nengeri tu ti datai tauka pulai ari menua luar, kena nyeliahka ari COVID-19 ngelekai ba menua kitai.

Sapit Kepala Menteri Sarawak, Datuk Amar Douglas Uggah Embas madahka, atur ti terit iya nya ngenukuka barang sapa nyengkaum bala nembiak ke belajar di menua luar tu enti pulai kitu deka dikuarantin nyentuk chukup timpuh ke udah ditetapka Opis Pengerai Malaysia (KKM).

Ku Uggah ti mega Chairman Komiti Mutarka Penusah Ngenyit Nengeri Sarawak, naka ripot ke diatu, bisi 94 iku nembiak Sarawak ti belajar di menua luar baka ari Singapura, US, UK enggau Indonesia pulai ke nengeri tu, semua sida iya udah diperesa pengerai lalu bisi sekeda ditemu positif.

"Bisi semilan iku peranak menua kitai ti pulai ari Indonesia.

"Pengudah diperesa pengerai, bisi enam (6) iku ari sida iya nya diripotka positif.

"Nya alai, kitai chukup terit bejalaika atur dikena nentuka timpuh kuarantin ti chukup ngagai orang ti pulai tauka datai ke Sarawak,” ku iya mansutka jaku tauka pekara nya ba Aum Pengarang Berita COVID-19 Sarawak ti diatur ba Wisma Bapa Malaysia ditu, kemari.