“Aku bisi ninga orang rerauh nganggauka aku, tang aku enda dapat nyaut kita..,” ku Cassidy -->
Cari Berita

Advertisement

“Aku bisi ninga orang rerauh nganggauka aku, tang aku enda dapat nyaut kita..,” ku Cassidy

Admin | beritaiban@gmail.com
April 27, 2020

KASIH AMAT: Cassidy diasuh gali ba 'stretcher' sebedau di bai ke POS Bomba.

MARUDI: Siku lelaki ke diripotka lenyau pengudah nurun nginti di Sungai Melikat Hari Lima, udah temu raban SAR, pagi tu tadi.

Nitihka penerang ke diterima Berita Iban Online, lelaki ke lenyau nya dikelala ngena nama Cassidy anak Ali.

Sebedau Cassidy diripotka lenyau, Hari Lima (24 April), Cassidy enggau siku agi bakih iya, Markus Adrian nurun nginti ba anak sungai di Sungai Melikat, urung 40 minit enti nyema bedarat ari rumah panjai sida iya.

Lebuh nginti, seduai iya sama udah berandau enggau deka bebagi endur, Markus nginti ke ili tang Cassidy nginti ke ulu urun penyauh 80 mita ari pangan diri.

Urung jam 4 lemai, Markus deka pulai ke rumah laban meda gaya hari nyau majak petang (chelum).

Sebedau pulai, Markus bisi beberapa kali nganggauka nama Cassidy laban deka mai iya pulai seretai, tang nadai disaut iya (Cassidy).

Meda iya nyaut, Markus melabaka iya (Cassidy) udah pulai ke rumah panjai.

Lebuh iya datai ba rumah panjai, Markus pan tekenyit pengudah bala sida serumah madahka iya (Cassidy) agi bedau datai tauka pulai ke rumah.

Berebak enggau nya, seraban bala sida iya serumah panjai lalu nurun nguji ngiga Cassidy ba palan seduai iya nginti, lemai nya (Hari Lima), tang iya (Cassidy) agi bedau temu.

Meda Cassidy agi ga bedau temu, pagi hari siti (Hari Enam) sida serumah nurun nguji ngiga iya baru, sebedau sida iya ngaga ripot polis urung jam 11 pagi di Balai Polis Marudi.

Pengudah raban Bomba dia, Operasyen Ngiga enggau Nyelamat (SAR) lalu dipejalaika enggau disaup seraban bala sida serumah panjai nyentukka iya (Cassidy) ditemu pagi tu tadi.

Pagi tu tadi (hari ke-tiga) Operasyen SAR dipejalai, bala ke sebilik enggau Cassidy deka ngena chara pengarap lama (miring) kena nguji ngiga iya.

Enda lama pengudah nya, sida iya bisi ninga baka ke bisi orang nyabak ba semak endur sida iya miring nya.

Nangkan ke nya, sida lalu angkat mupuk ngiga Cassidy ba palan nya.

Raban SAR mujur tetemuka iya (Cassidy) urung jam 10.45 pagi tadi, urung penyauh enam kilomita ari rumah panjai sida iya.

Lebuh iya ditemu, Cassidy dipeda baka orang ke lemi tulang (enda regas), bisi abi bakal ba mua, jari enggau kaki iya.

Lebuh ke ditanya, Cassidy pan madah baka chara iya ngidup kediri pengelama empat hari udah lenyau nya.

Ku Cassidy, aku bisi ninga kita rerauh nganggauka nama aku tang aku enda dapat nyaut kita.

“Aku lalu nadai makai, aku semina ngirup ai aja,” ku iya lebuh nyaut bala ke bisi dia.

POS Bomba

Cassidy dibai ke POS Bomba dulu sebedau mai iya betemu enggau raban polis kena bejalaika pengawa silik agi.

Ketuai Opis Bomba enggau Penyelamat Malaysia Zon 6, PgKB1, Law Poh Kiong lebuh ke ditanya pengarang berita madahka Cassidy amat udah temu pagi tu tadi.

Operasyen SAR lalu diketu tauka tembu pengudah Cassidy ditemu sida iya.