Anang guai pulai ke rumah panjai maya PKP -->
Cari Berita

Advertisement

Anang guai pulai ke rumah panjai maya PKP

Admin | beritaiban@gmail.com
April 23, 2020

Picha rumah panjai orang Gelam, Sebauh pengudah tembu pengawa dekoraksyen sebedau ngintu Hari Gawai. 📷 #HarryFrancis

KUCHING: Mensia mayuh ke diau di mengeri sekumbang timpuh Atur Mindah Besekat (PKP) dilalau tauka ditagang anang pulai ke rumah panjai maya tu dikena nyeliahka ari penyakit COVID-19 ngelekai ba rumah panjai.

Sapit Kepala Menteri, Datuk Amar Douglas Uggah madah, nya kebuah PKP entara pelilih menua chukup terit dipejalaika dikena nyeliahka pengelekai penyakit COVID-19 ngagai kandang endur gadung ti nyengkaum rumah panjai.

Naka ke diatu, Puji Tuhan! nadai orang ari rumah panjai diripotka positif COVID-19.

Ukai ngajihka rangkang ngachuk mata tang manah agi kitai nyikup diri ari penusah ke enda disadang nyadi.

Enti nyema bisi orang datai tauka ukai genturung pendiau rumah panjai nya ti kena rampit ngusung kia, kitai enda ulih madahka sida nya orang rumah panjai.

“Aku ngelalau orang ke gawa ba kandang pasar enggau mengeri anang beguai pulai ngagai rumah panjai kitai diatu, nganti gaya penusah ke nyadi diatu nyau belinsur manah.

“Laban enti pulai ke rumah panjai nya tau ngaga rentayan bukai ti udah tentu deka meri penanggul, nya kebuah kitai chukup terit senentang PKP pelilih menua,” ku Uggah ti mega Chairman Komiti Mutarka Penusah Ngenyit Nengeri Sarawak  (JPNS)

Uggah mansutka jaku tauka pekara nya ba Aum Pengarang Berita COVID-19 Sarawak ba Wisma Bapa Malaysia ditu, ensana, Hari Dua (21 April).

Berebak enggau tu, kami ari Berita Iban Online deka ngelalau semua bala kitai ti bisi rumah panjai tau enda ibuh pulai ke menua maya tu.

Kapa nuan nyebut pasal lelenggauka rumah panjai panjungka Hari Gawai nyau ngansak sesemak.

Kami pan rindu sereta sinu ngenang bala apai indai, menyadi, aki inek enggau kaban belayan ke diau di rumah panjai tang nadai ku enggau iya mih laban dunya kitai agi sigak.

Semina ulih berandau betalipaun deka nanya berita enggau kena mantupka pengelenggau ati ngagai semua sida iya.

Anang guai pulai dulu mih diatu kena nyaga pengelikun enggau pengerai semua bala kitai ke diau serumah panjai. Tuhan merekat semua 🙏