Anang ngengetu, titihka aja Atur PKP.. -->
Cari Berita

Advertisement

Anang ngengetu, titihka aja Atur PKP..

Admin | beritaiban@gmail.com
April 24, 2020

CHUNTO ATUR PKP: Tiga peranak menua Malaysia benung bebaris lebuh deka meli utai empa (pemakai) ba McDonald's.

KUCHING: Rayat Sarawak dipinta anang ngengetu, nitihka jaku tangkan Atur Mindah Besekat (PKP) ngambika ulih kena nagang pengelekai COVID-19 taja pan maya bulan puasa (Ramadan) tauka ngintu pengerami Hari Raya enggau Hari Gawai Dayak.

Kepala Menteri Sarawak, Datuk Patinggi Abang Johari Tun Openg madah, gaya ke nyadi nuntung menua kitai diatu, ibadah bepuasa tauka nyambut pengerami Gawai enda ulih dipejalaika tauka diintu baka ngelama tu.

Iya mai rayat ngambika terus besabar napi semua penanggul maya Atur PKP dipejalaika.

"Keterubah, lebuh kitai betapi enggau igi penyakit COVID-19 sereta dalam timpuh PKP, aku enggau peluang tu ngarika perintah Sarawak deka meri selamat bejalaika tanggungpengawa bepuasa ba bulan Ramadan ngagai semua raban orang Islam di nengeri tu.

"Berebak enggau tu, aku enggau ngarika kami sebilik deka meri selamat nyambut Gawai Dayak ngagai semua bansa Dayak laban pengerami Gawai enda lama agi.

"Aku amat ngarapka tiap raban bansa terus nitihka lalau tauka gerah Atur PKP laban mayuh orang ti udah bebadi nyawa ketegal COVID-19 lalu penyampau tu tinggi ba Sarawak. Seraya kitai benung bebendar deka mutuska rentayan kena rampit COVID-19," ku iya nengah siti penerang, kemari.

Ku iya, dalam timpuh gaya menua diatu tauka sekumbang Atur PKP dipejalaika semua pengawa begempuru sigi enda dikemendarka.

Iya mega meransang rayat ngambika ngemeran, ngemeratka pemeresi enggau pengerai diri kena nyeliahka ari rampit virus nya.

Nambahka nya, iya ngingatka semua lebih agi ngagai orang ti bisi kontak enggau orang ke ditemu positif COVID-19 dipinta lengkas beperesa pengerai.

"Entara chara tauka atur ke patut terus dititihka iya nya, nentuka pengawa begempuru enda diatur seagi gaya menua kitai mengkang enda meruan enggau terus ngemeranka disiplin diri ari segi pengerai ngambika enda dirampit.

"Ngagai sida ti bisi kontak enggau orang ti udah ditemu positif, lengkas mih madah ngagai sida raban penyaga pengerai (sepital) ke semak ngambika ulih diperesa," ku iya.