Bangkai siku lelaki ditemu melepu di Sungai Batang Rajang -->
Cari Berita

Advertisement

Bangkai siku lelaki ditemu melepu di Sungai Batang Rajang

Admin | beritaiban@gmail.com
April 26, 2020

KASIH AMAT: Raban polis benung ngatung bangkai lelaki nya (kanan), sebedau iya dibai ke Balai Polis Lanang.

SIBU
: Peranak Pelilih Sibu begau tengahari kemari, pengudah bangkai siku lelaki ti nadai ngena gari ditemu melepu di Sungai Batang Rajang.

Ketuai Polis Pelilih Sibu, ACP Stanley Jonathan Ringgit madahka raban polis bisi nerima ripot bekait enggau bangkai siku lelaki ditemu melepu di Sungai Batang Rajang, Durin, urung jam 12 tengahari.

Berebak enggau nya, seraban polis lalu berumban ngesah ke palan penusah nyadi ngambika ulih bejalaika pengawa mansik.

"Bangkai lelaki nya mujur ditemu ba jematan Lanang urung jam 1.25 lemai," ku iya lebuh dirandau pengarang berita.

"Enti nitihka pendiau bangkai, lelaki nya dipelabaka beumur 30-an enggau dipechayaka udah lemas pengelama dua nyentuk tiga hari ti udah lalu.

Ku Stanley, sapa lelaki ke ngempu bangkai nya apin temu laban nadai dokumen pengelala iya di temu ba palan penusah nyadi.

Ku Stanley, naka kemari, raban kami nadai nerima ripot bekait orang lenyau.

Orang mayuh ti bisi penerang tauka bisi bala diri sebilik lenyau, kita tau ngusung balai polis ke semak ngambika raban polis ulih nasat kes tu enggau silik agi.

Naka ke diatu, kes nya ditukuka nyadi Parai Ngenyit.