Bank BSN Sibu digulu mensia mayuh, nerima berita ti enda engkeman -->
Cari Berita

Advertisement

Bank BSN Sibu digulu mensia mayuh, nerima berita ti enda engkeman

Admin | beritaiban@gmail.com
April 19, 2020

BEBARIS DULU SEBEDAU TAMA BANK BSN: Raban Polis enggau Rela benung nyaga enggau ngatur mensia mayuh ke bisi datai dia.

SIBU: Ketegal nerima berita ti enda engkeman ba media rama ngujungka mensia mayuh bebaris panjai nganti gintir diri, urung pemanjai 200 meter di Bank Simpanan Nasional (BSN) Sibu, kemari.

Ketuai Polis Pelilih Menua Sibu, ACP Stanley Jonathan Ringgit, madah mensia mayuh nerima berita bekaul enggau baucher Bantuan Prihatin Nasional (BPN) ti semina ulih diatur (redeem) dalam kandang dua hari tu aja.

Ku iya, bank BSN nya digulu mensia mayuh kenyau ari pukul 6 pagi, kemari.

"Kitai enda ulih nyalahka sida ke datai maya nya laban sida iya nerima penerang ke enda engkeman.



"Nya alai, kami bisi ngelalau sekeda ari raban ke bisi datai ba bank nya, ngambika sida pulai dulu tauka datai sebarang maya ba hari ke bukai," ku iya lebuh dikerandau pengarang berita maya bejalaika pengawa ngemataka bank nya, pagi kemari.

Ku Stanley, raban BSN Sibu madahka baucher BPN nya ulih diatur nyentuk ngagai 31 Disember taun tu.

"Taja pia, raban bank endang udah ngadang pekara ke baka tu deka nyadi.

"Berebak enggau nya, sida (raban BSN) udah nyikap diri tumu lalu minta bantu ari raban RELA enggau polis dikena nyaga enggau ngatur sentang pekara tu.

"Penatai kami ditu iya nya dikena nentuka sida bebaris enggau betul sereta nitihka Atur PKP (Atur Mindah Betagang), kelebih agi ngemeranka Sosial Distancing," ku iya.

Kelimpah ari nya, siku ari raban BSN Sibu, madah bala kami udah meri komitmen 100 peratus dikena mantu mensia mayuh ngatur baucher BPN sida iya.

"Raban BSN Sibu mega udah muka semua kaunter dikena ngelengkaska pengawa ngatur baucher orang ke nerima bantu BPN nya.

"Taja pia, berindik ari Atur PKP tu, kami melabaka pemayuh baucher ke ulih diatur kami dalam sehari, iya nya urung 300 iku aja.

"Kami seruran bebendar nguji niki ke penyampau nya," ku iya.