Bisi polis nyaga ba dua bank BSN di Sibu, nagang mensia mayuh begelumu -->
Cari Berita

Advertisement

Bisi polis nyaga ba dua bank BSN di Sibu, nagang mensia mayuh begelumu

Admin | beritaiban@gmail.com
April 20, 2020

DUDUK ENDA LAMA: Sekeda ari picha orang mayuh benung nganti gintir sebedau tama ke dalam bank BSN, kemari.

SIBU: Bisi raban pemesai polis udah diasuh nyaga dua buah pampang Bank Simpanan Nasional (BSN) ditu, ngambika ulih nagang mensia mayuh begelumu maya ngatur baucher Bantuan Prihatin Nasional (BPN).

Ketuai Polis Pelilih Menua Sibu, ACP Stanley Jonathan Ringgit, madah lapan iku raban pemesai polis udah diasuh nyaga BSN di Jalai Kampung Nyabor ditu, lalu enam iku ba BSN Pampang Sibu Jaya.

“Kami agi neruska pengawa ngemata tu, belalauka penyampau mensia mayuh ke bisi ngelawa dua buah bank nya.

“Kami mega deka ngelalau sida ke ka kia (mensia mayuh) ngambika ngelawa bank nya ba hari ke bukai, enti sida nadai penanggul ari sukut belanja laban timpuh baucher nya agi ulih diatur nyentuk ke ujung taun tu,” ku iya lebuh dirandau pengarang berita maya iya bejalaika pengawa ngemata ba BSN Sibu, pagi kemari.

Ku iya, pengawa ngemata di BSN Pampang Sibu Jaya diketuaika Sapit Ketuai Polis Pelilih Menua Sibu, Superintenden Collin Babat.

"Pengawa ba buah bank nya bejalai enggau manah tauka nadai penanggul laban mensia mayuh ke bisi datai meri sukung sereta nitihka atur ari raban polis enggau tim RELA ke gawa.

Ku Stanley, raban pemesai iya mega seruran nentuka atur baka Sosial Distancing enggau mensia mayuh dikemeranka nyaga pengerai seruran.

“Kami udah ngadang sehari tu (kemari) endang mayuh orang laban maya tu ujung minggu, tang agi ulih dijaga raban polis enggau tim RELA.

“Pekara ti pemadu beguna iya nya mensia mayuh patut seruran nitihka atur perintah ari raban bekuasa,” ku iya.

Nangkanka nya, siku ari raban BSN Pampang Sibu, madah BSN udah mandangka berita ba laman web enggau media rama sida empu, bekaul enggau baucher BPN nya ulih diatur ba BSN nyentuk 31 Disember 2020.

Kelimpah ari nya, mensia mayuh dilalau ngambika enda begelumu ba palan ke mayuh orang sereta nitihka atur Sosial Distancing sepemanjai timpuh Atur Mindah Besekat (PKP) tu.