Dini tau nyabung manuk, main kuluk maya PKP -->
Cari Berita

Advertisement

Dini tau nyabung manuk, main kuluk maya PKP

Admin | beritaiban@gmail.com
April 27, 2020

NYA UPAH NUAN: Tiga lelaki ke mujur ditangkap polis ba kelang sabung kemari.

SABAH: Taja pan udah nemu pasal Atur Mindah Besekat (PKP) agi dipejalai, seraban lelaki ukai semina ngelaban Atur PKP aja tang nyau ngasuh sida iya chapuh begempuru nyabung enggau main kuluk.

Taja pia, ulah ti enda menuku ke digaga sida nya tebantai lebuh seraban polis ari Balai Polis Pelilih (IPD) Tenom bejalai abas ngenyit ba sebuah tanah kebun di Kampung Mampusu, urung jam 2.50 lemai kemari.

Ketuai Polis Pelilih Tenom, Deputi Superintendan Hasan Majid madahka, lebuh datai ba kelang sabung nya, urung penyampau 10 nyentuk 15 lelaki benung begempuru sereta ranchak meda manuk bebintis.

“Pengudah sida nemu polis bisi mansang kia, semua sida iya lalu bekesebar ngelarika diri ari kelang sabung nya. Tang tiga lelaki beumur 55 nyentuk 80 taun mujuk ditan polis.

“Inspektor Mohd Roezaidie ti nyadi ketuai lebuh abas ngenyit madah sida iya mega ngerampas tiga iku manuk sabung,” ku iya lebuh dirandau pengarang berita.

Ku iya, asil tanya saut ba siku ari sida ke kena tangkap nya, polis mega mujur tetemuka perengka ke dikena main kuluk (holo).

“Asil tanya saut tumu, semua sida ke kena tangkap nya madahka diri enda nakal nadai pengawa diau di rumah. Nya alai sida iya nurun enggau orang nyabung.

“Sida tiga (suspek) enggau semua perengka guna nyabung enggau bejudi ke udah dirampas dibai ke IPD Tenom kena bejalaika pengawa mansik silik agi,” ku iya.

Ku Hasan, kelimpah ari pengawa nyabung enggau main kuluk, sida iya tiga enda ulih nyaut enggau kebuah ti penting (reasonable) lebuh ditanya nama kebuah sida iya bisi ba kelang nya maya PKP.

“Kes dipansik ari baruh "Seksyen 269 Kanun Keseksaan, Peraturan 11 (1) Peraturan – Peraturan Pencegahan, Pengawalan Penyakit Berjangkit (Langkah-Langkah Di Dalam Kawasan Tempat Jangkitan (No.3) 2020 dan Seksyen 21 Enakmen Kebajikan Haiwan 2015 dan Seksyen 7(2) Akta Rumah Judi Terbuka 1953",” ku iya.