Dua lelaki ditangkap polis, ngelaban Atur PKP enggau ngundan 60 kutak ai bia -->
Cari Berita

Advertisement

Dua lelaki ditangkap polis, ngelaban Atur PKP enggau ngundan 60 kutak ai bia

Admin | beritaiban@gmail.com
April 19, 2020

MAYUH NYA: Ai bia ke diundan seduai iya (suspek) ngena sebuah van.

BAU: Dua lelaki ditangkap polis ketegal ngelaban Atur Mindah Besekat (PKP) enggau nadai dokumen sukung mai 60 kutak ai bia ngena sebuah van di Jalai Tasik Biru, pagi tadi.

Siku lelaki (suspek) peranak menua Malaysia enggau siku agi lelaki Indon.

Seduai iya (suspek) ditan polis lebuh raban polis bejalaika pengawa meresa enggau ngemata ba pelilih menua nya urung jam 11.30 pagi tadi.

Ketuai Polis Pelilih Bau, DSP Poge Nyaon, madah seduai iya (suspek) enda ulih meri kebuah ti logik tauka enda ulih nyaut lebuh ditanya raban polis nama kebuah seduai iya pansut ari rumah enggau bejalai ngena van.

"Kelimpah ari nya, seduai iya mega nadai mantaika dokumen ti sah kena bejual enggau meli ai bia 60 kutak nya.

"Semua bia ke diundan seduai iya nya udah dirampas raban polis.

"Raban polis diatu agi mansik kes enggau deka nyuaka keretas pansik ngagai opis luya kena bejalaika pengawa silik agi.

Naka kediatu, seduai iya (suspek) ditangkap ari baruh "Seksyen 186 Kanun Keseksaan, Seksyen 11 (1) Pencegahan dan Pengawalan Penyakit Berjangkit (Langkah-langkah Di Kawasan yang Dijangkiti 2020), Seksyen 135 (1) (d) Akta Eksais 1976, Seksyen 15 (1)  Akta Imigresen 1959/63 dan Akta Kastam 1967."