“Endu, ulih nuan meri aku utai empa?,” ku orang tuai nya.. -->
Cari Berita

Advertisement

“Endu, ulih nuan meri aku utai empa?,” ku orang tuai nya..

Admin | beritaiban@gmail.com
April 28, 2020

KASIH AMAT: Ermy (baju chura chelum) nyuaka asi ke dipinta orang tuai ti ngena selapuk.

MIRI: “Enda berasai ai mata labuh baka leka ujan nelian naya bekeberai ngemasahka kuyu aku, pengudah siku orang tuai minta kasih enggau ngasuh aku meli asi lauk jani,” ku siku indu ti benung bebelika manuk girau kekerup di Taman Tunku, kena Hari Lima (25 April 2020).

Nitihka ke diterima Berita Iban Online, orang tuai nya dikelala ngena nama Kedit anak Baja, orang ari Kapit.

Indu ke endur orang tuai (Kedit) minta utai empa nya dikelala ngena nama Ermy Bantan madahka, aku ditanya orang tuai nya maya aku benung bebelika manuk girau kekerup ba kedai Ulu Cafe di Taman Tunku, ditu.

“Orang tuai nya datai lalu ngelawa aku enggau madah kediri lepi tauka lapar.

“Aku nyaukka nuan diut, nuan meli kediri empu nama utai ke deka empa nuan.

“Enda ibuh meri aku duit, Endu. Aku semina minta kasih ari nuan meli ke aku asi lauk jani,” ku orang tuai nya enggau tubuh ti gegetar engka laban kelalu lepi.

Ku Ermy, nyau enda berasai ai mata labuh baka leka leka ujan nelian naya bekeberai ngemasahka kuyu aku pengudah ninga orang tuai nya madah kediri lepi enggau meda pendiau tudah iya baka ke nadai orang ngibun.

Pengudah nya, aku pan meli ke iya asi lauk jani ba kedai cina ke semak dia.

“Bisi ga ati aku deka mai iya makai ba kedai tang nya mih laban Atur Mindah Besekat (PKP), kitai semina ulih meli enggau mai pemakai pulai aja.

“Pengudah orang tuai nya tembu makai, aku bisi nguji nanya nama kebuah iya tau nadai duit belanja enggau nadai endur ngenduh,” ku Ermy.

“Sebedau penusah nyadi, orang tuai (Kedit) deka pulai ke rumah menyadi iya di Bintulu tang enda memukai kandik duit enggau semua dokumen pengelala iya ditaban tauka dichuri orang.

“Enggau sesabak orang tuai (Kedit) nusika penusah ke ditapi iya nya.

“Bepun ari nya mih orang tuai nya dedayau enggau tinduk semina bepanggalka lengan aja ba sebelah Tamu ditu,” ku Ermy.

“Aku mansutka penusah ke ditapi orang tuai (Kedit) ba media rama laban aku deka ngasuh bala ke sebilik iya ulih nemu enggau ngambi tudah tuai kitu.

“Aku kasih amat ngenang tudah tuai enda meruan makai enggau endur ngenduh tauka tinduk. Tambah mega diatu musin ujan,” ku iya lebuh ke dirandau pengarang Berita Iban Online.

Berebak enggau tu, kami ngarapka bala ke ngelala Kedit anak Baja tauka orang sebilik enggau iya ulih ngesah kia enggai mai iya pulai enggau naka pengelengkas.

Kasih amat.. 😢