Kada enda iya udah tagup baya.. -->
Cari Berita

Advertisement

Kada enda iya udah tagup baya..

Admin | beritaiban@gmail.com
April 23, 2020

ILLUSTRASYEN PICHA: Baya benung ngayanka pala iya ba sungai.

SRI AMAN: Siku lelaki diripotka lenyau pengudah bakih iya meda baka ke lelaki nya udah kena sipat baya ba sungai di Kampung Melayu, Tanjung Bijat, ditu, kemari.

Pengari Operasyen Opis Bomba enggau Penyelamat Malaysia (JBPM) Sarawak madah sida iya bisi nerima ripot bekaul enggau pengelenyau lelaki nya urung jam 3.59 lemai.

Ku iya, sebedau penusah nyadi, lelaki ke diripotka lenyau nya nurun mukat begulai enggau tiga iku bakih iya ba sungai nya.

"Lelaki nya dipechayaka nyelam ke dalam sungai nya.

"Enda memukai, tiga bakih iya ke bisi ba tebing sungai nya meda baka senayau iya ti kena sipat baya sebedau iya nadai peda agi tauka lenyau," ku iya lebuh dirandau pengarang berita kemari.

Berengkah ari nya, bakih iya lalu berumban nesau genturung pendiau dia sebedau ngeripotka pekara nya ngagai polis enggau JBPM.

Naka jam 5 lemai kemari, tubuh lelaki nya agi apin temu enggau Operasyen Ngiga enggau Nyelamat (SAR) agi benung dipejalai.

Taja pia, berita tu deka ditandu kami baru nganti udah bulih penerang ti silik ari opis ke megai tanggungpengawa.