Niang ASP Aldrin Gonda disengaie malam tu, dikubur pagila -->
Cari Berita

Advertisement

Niang ASP Aldrin Gonda disengaie malam tu, dikubur pagila

Admin | beritaiban@gmail.com
April 21, 2020

NYAU BEKEBERAI AI MATA LABUH NAYA: Apai enggau inda niang enda ulih ngetatka penyinu ati seduai pengudah meda lungun niang lalu ngujung ke seduai sama bela nyabak. Kasih amat 😢

KUCHING: Pendiau ba MASkargo bebali nyadi endur ti chukup sinu pengudah ninga munyi nyawa, leka sabak bala ke sebilik enggau niang ASP Aldrin Gonda ti udah midang ketegal eksiden ba simpang trafik light Arkib Negara, Alor Setar, Kedah kena Hari Minggu tu tadi.

Nitihka penerang, bala sida iya sebilik udah datai tumu urung jam 7 pagi tadi pengudah nerima penerang bangkai niang deka dibai ke Kuching ngena bilun MASkargo, sehari tu.

Pengudah tembu pengawa dokumentasi urung jam 9.30 pagi, tubuh niang diengkah ba lungun chura burak enggau disuaka ngagai raban polis.

Apai enggai indai niang (Gonda Bong Mim Fui & Milah Majin) nganti penatai bangkai iya.

Apai enggau indai niang enda alah ngetatka penyinu ati lalu ngujung ke seduai iya sama bela nyabak.

Indai niang enggai bebadu nyabak.

Apai niang ngaum indai iya ti bendar amat nyabak.

Lungun niang dikatung raban pemesai kanan ari Opis Polis Kontinjen (IPK) Sarawak ke dalam van bangkai sebedau dibai ke rumah sida iya di Kampung Terbat Leban, Tebakang Serian.

Bala pemesai polis Sarawak mega bisi datai ngesah enggau meri tabi kepenudi ngagai niang ASP Aldrin.

Niang ASP Aldrin deka disengaie bebala mayuh malam tu enggau dikuburka pagila ba tanah kubur Kampung Terbat Leban, Tebakang.

Niang ASP Aldrin Gonda,38 taun, ti nyadi Ketuai Opis Tasat Jenayah Narkotik (IPD) Pelilih Kota Setar, midang ketegal balat bakal pengudah entuka polis eksiden ba simpang trafik light Arkib Negara, Alor Setar, Kedah kena Hari Minggu tu tadi.

Dua iku agi raban polis ke napi eksiden sama diripotka bakal pala enggau dua piak kaki seduai iya.

Kes agi dipansik ari baruh Seksyen 41(1) Akta Pengangkutan Jalan 1987.