Pelilih menua Sibu, Sarikei udah bebali nyadi zon gadung -->
Cari Berita

Advertisement

Pelilih menua Sibu, Sarikei udah bebali nyadi zon gadung

Admin | beritaiban@gmail.com
April 24, 2020

PUJI TUHAN: Maskot pelilih Sibu (kiba) enggau pelilih Sarikei (kanan)

KUCHING: Pelilih menua Sibu enggau Sarikei udah bebali nyadi zon gadung, sebedau tu dua pelilih nya agi ba dalam kategori zon kuning.

Sapit Kepala Menteri, Datuk Amar Douglas Uggah Embas, madah nya nyadika penyampau semua kandang endur ti ba kategori zon gadung iya nya 28 pelilih menua.

Pelilih menua ti dipasukka dalam kategori zon gadung, iya nya pelilih menua ti nadai ngerikodka kes positif COVID-19 dalam timpuh panjai baka 14 hari.

"Sehari tu (kemari) enggau gaga ati deka madah, iya nya enti sebedau tu dua pelilih menua tu dikategorika nyadi zon kuning tang diatu udah bebali nyadi zon gadung iya nya, pelilih Sibu enggau Sarikei.

"Lalu penyampau pelilih menua gadung kitai iya nya 28.

"Nama kebuah kitai ngemansutka pelilih menua Sibu enggau Sarikei ari kategori zon kuning sereta dipasukka ngagai kategori zon gadung, laban nadai ngerikodka kes dalam timpuh 14 hari ke udah. Baka pelilih menua Mukah ti nadai ngerikodka kes dalam timpuh 34 hari ke udah," ku Uggah ti mega Chairman Komiti Mutarka Penusah Ngenyit Nengeri Sarawak, mansutka jaku tauka pekara nya ba Aum Pengarang Berita COVID-19 Sarawak ti dipejalaika ba Wisma Bapa Malaysia ditu, kemari.

"Bekaul enggau pekara nya, pekara ti patut diperatika kitai jauh sereta mungkur semua, enti meda kar Sarawak pelaba aku urung 70 peratus kandang endur dalam kategori zon gadung, tu patut ditanka kitai ngambika majak bebali nyadi zon gadung.

Kelimpah ari pelilih menua Sibu enggau Sarikei dalam kategori gadung iya nya nyengkaum Lawas, Mukad, Matu, Lundu, Saratok, Pusa, Kabong, Lubok Antu, Meradong, Julau, Pakan, Kanowit, Selangau, Tatau, Sebauh, Dalat, Daro, Tanjung Manis, Kapit, Belaga, Song, Bukit Mabong, Marudi, Subis, Beluru enggau Telang Usan.