Pulai mai ati ti asa.. -->
Cari Berita

Advertisement

Pulai mai ati ti asa..

Admin | beritaiban@gmail.com
April 29, 2020

BESABAR NGANTI: Peranak menua Pakan berintai nitih gintir laban deka ngambi pas pemendar pansut ke Sarikei, pagi kemari.

SARIKEI: Seraban ari orang ke udah lama berintai nitih gintir ti deka ngambi pas pemendar pansut ke Sarikei pulai mai ati ti asa pengudah sida iya diasuh bala pemesai polis pulai, kemari.

Stanley Amsnov Gasah, peranak menua tauka rayat Pakan, mansutka sebana ati iya ba media rama urung jam 10.40 pagi kemari.

Sebana ati ke dipansutka nya bebali nyadi tebilang (viral) pengudah orang mayuh (netizen) ke bisi kena internet  berasai sinu ngenang penanggul ke ditapi peranak menua nya.

Ku Stanley, aku empu pen bisi enggau orang bebaris sama nganti gintir deka minta Pas Pansut Pelilih (Pas Keluar) kemari, tang kami diasuh pulai magang.

KASIH AMAT: Pemayuh bala mensia ke berintai nitih gintir laban deka ngambi pas pemendar pansut (Pas Keluar), pagi kemari.

“Kaunter ke endur minta pas pemendar pansut pelilih dibuka belabuh ari jam 8 pagi, tang udah badu (tutup) urung jam 8.49 pagi laban pas udah abis.

“Kebuah pia laban semina 70 iti pas aja diberi, tang agi ulih diberi insur ngagai orang ti tabin tauka sakit.

“Kasih ga mega bala orang ke tuai udah berintai kira nyau setengah jam enggau ati ti andal ulih mansutka duit. Sinu meda anak gamal.

“Tang nadai kitai nemu, siku dua tauka lebih entara orang ke datai dia bisi penanggul lebuh deka undur ke pasar Pakan, ngutang dulu tauka iya numpang orang?. Bisi pemakai tauka enda iya di rumah din?. Manah ke enda jalai sida?,” ku iya lebuh dirandau pengarang Berita Iban Online, sehari tu tadi.

Ku iya, aku mega sempat betanya ngagai orang ke bisi dia, sida mayuh enda nemu enggau ubah Atur Mindah Besekat (PKP) nyentukka kemari (28 April 2020) laban hari ke sebedau tu nadai tatak pas nya diberi sida.

“Aku empu pen enda nemu taja aku main tauka megai talipaun binching belama.

“Berita ubah atur nya nyangka enda sangkai ba sekeda rayat Pakan, ni enda mayuh ga orang mansang datai kia.

“Kelebih agi bala orang ke diau ba menua ulu din enti nyema berita nya semina dipansutka nengah media rama enggau aplikasyen Whatsapp aja, ukai nya bisi line internet din.

“Ku sida bisi orang nya nyebut dalam radio pagi nya, tang mayuh orang udah nurun tumu enggau datai dia urung jam 6 pagi.

“Nadai salah ka nukar, kami sigi nitih aja atur ti digaga ari raban pemesai tang mesti beri notis tumu,” ku iya.

“Tang pekara tu sigi udah lama nyadi, diatu nyau datai ba minggu ke tiga enti enda salah aku bepun ari BPN tama maya nya.

“Pelaba aku ukai semina sekali tu aja, orang ke udah sebana pasal utai tauka pekara tu, ukai aku siku..

“Tu mih salah siti ari penanggul ti chukup pedis ba kami di menua deka ngambi duit laban nadai inisiatif ti engkeman enggau efisyen dikena ngemutarka penanggul tu.

“Nya alai ba sadang penemu aku ti nyadi rayat Pakan, aku ngarapka perintah menua kitai ngaga Bank Bejalai (Bergerak) tauka Agen Bank ngelawa kami ke pakan kitu,” tandu Stanley ti ngarapka raban opis ti bekuasa ulih ngemutarka tu ngena chara ti engkeman enggau efisyen.

Kelimpah ari nya, raban kami mega bisi ngerikod sekeda ari komen tauka buah runding ari mensia mayuh (netizen) ke ngena media rama.

“Bank bergerak tu penting dan perlu diutamakan sbb ramai yg keluarkan duit beli barangan keperluan harian,” ku MaR's Page.

“Sinu ngenang 😢 jauh2 ari menua ulu last2 asuh nikal pulai,” ku Florence Ulai.

“Akai... kasih amat. Enti aku polis, beri surat magang sida ke udah bebaris nya, tang letak ari iya enda sereta. Enda ga tudah bebaris baru pagila / hari bukai,” ku Juna Manggi.

Berebak enggau tu, kami ari Berita Iban Online ngarapka bala ari opis perintah di menua kitai ulih ngemutarka pekara tu enggau ninga ke sebana ati rayat Pakan.