Semina 2 iku aja orang ti bumai dikemendar ngena sebuah kerita, motosikal -->
Cari Berita

Advertisement

Semina 2 iku aja orang ti bumai dikemendar ngena sebuah kerita, motosikal

Admin | beritaiban@gmail.com
April 19, 2020

ILLUSTRASYEN PICHA: Raban polis enggau sedadu benung bejalaika pengawa meresa entuka.

KUCHING: Komiti Mutarka Penusah Ngenyit Nengeri Sarawak (JPBNS) ngaga pemutus sereta ngemendarka orang bumai ke nurun ngetau padi, semina dua (2) iku aja dikemendarka ngena tauka nepan sebuah kerita tauka motosikal.

Sapit Kepala Menteri, Datuk Amar Douglas Uggah Embas madah pekara nya udah dipadahka ngagai raban polis.

Sebedau tu, semina siku aja dikemendarka nepan tauka ngena sebuah kerita tauka motosikal.

"Diatu ba menua pesisir benung musin ngetau padi. Nyadi sebedau tu kitai udah madah semina dikemendarka siku (1) aja ulih dalam kerita lalu pia mega motosikal.

"Kitai patut ulih berundingka utai ti nyenggala tauka pekara nyadi ti ba kitai empu (realistic), kekadang laki bini patut segulai sama nurun lalu maya ke nurun ngetau nya sekalika ngena kerita tauka motosikal.

"Nya alai kami minta kasih ari raban polis ngambika ngemendarka orang ti deka nurun ngetau ke umai iya nya, dua iku ulih ngena siti kerita tauka motosikal," ku iya seraya ngarapka nadai orang beambi ulih ba atur nya.

Uggah mansutka jaku tauka pekara nya ba Aum Pengarang Berita COVID-19 Sarawak ti diatur di Wisma Bapa Malaysia ditu, kemari.