Seminggu sebedau penusah nyadi, niang ngirum duit belanja, berandau enggau anak iya -->
Cari Berita

Advertisement

Seminggu sebedau penusah nyadi, niang ngirum duit belanja, berandau enggau anak iya

Admin | beritaiban@gmail.com
April 21, 2020

KASIH AMAT: Apai niang ASP Aldrin (Gonda) bediri, kiba enggau indai iya (Milah) sepiak kanan megai picha niang.

KUCHING: Pemidang ASP Aldrin Gonda, 38, asaika bemimpi jai ti enda ulih diterima indai iya ke dikelala ngena nama Milah Majin.

"Aku enda ulih pechayaka niang udah midang lelang enda pulai agi, asaika bemimpi jai," pia ku indai iya ti tegepang ati pengudah nerima berita ti chukup sinu nya, ensana, maya niang diripotka udah nadai kena 19 April 2020.

Apai Aldrin, Gonda Bong Mim Fui mega sama tegepang ati pengudah nerima berita ti enda disadang nyadi ba ruang bilik sida iya.

Urung jam 1 tengahari, ensana, Milah keterubah sekali nerima kangau (call) ari bini Aldrin, Anastasia Chu, 33, ti gawa nyadi Staf Nurse ba Unit Forensik di Sepital Sultanah Bahiyah, Alor Setar, Kedah.

Lebuh betalipaun, Anastasia enda ulih tepansutka jaku deka madahka utai ti udah nyadi tauka pekara nya ngagai entua iya (Milah), ke benung makai tenghari enggau Anastasia ngasuh entua indu iya nyuaka talipaun ngagai entua laki iya (Gonda).

Lebuh Gonda nyaut talipaun nya, Anastasia semina ulih madahka ba entua laki iya Aldrin udah eksiden enggau lalu nginsil talipaun nya sebedau iya ulih madah Adrian udah nadai.

Ketegal enda bulih penerang ti silik ari Anastasia, Milah lalu nganggauka (call)  anak ke lumur dua seduai iya, Anselm, ngambika ulih meri penerang ti silik pasal pekara ti nyadi ba Aldrin.

Pengudah Anselm bulih penerang ti silik, iya pan betalipaun asuh indai iya (Milah) madahka menyadi iya Aldrin udah nadai lebuh bejalaika pengawa.

"Pengudah aku nemu rita niang udah midang, aku pan lalu nyabak enggau ai mata enggai bebadu labuh naya.. Bendar aku nganggau enggau nyebut nama aku Aldrin, anak ti dikesayauka aku...” ku Milah lebuh dirandau pengarang berita.

Kemari, apai enggau indai Adrin (Milah & Gonda) udah nyain surat pemidang anak tuai seduai iya Aldrin tang seduai iya enda ulih nagang ai mata ti nyau majak labuh naya.

Apai Aldrin (Gonda), ti nyadi pengajar pinchin, madahka diri berasai temegah ati enggau niang Aldrin ti udah nyadi chunto enggau teladan ti chukup manah ngagai bala menyadi biak iya.

"Anak lelaki aku (Aldrin) ti nyadi raban polis enggau iya bededikasyen lebuh ngereja pengawa.

"Iya mega udah meri chunto enggau teladan ti manah ba bala sida semenyadi.

"Iya chukup manah budi enggau basa lebuh begulai enggau diri menyadi, bala kaban belayan tauka enggau orang bukai. Nya alai aku temegah ati ngenang pemanah anak ti dikesayauka aku nya, iya midang nyadi hero,” ku Gonda.

Apai Aldrin mega madah Aldrin siku anak lelaki ti chukup disiplin tauka enda melakang ke tanggungpengawa enggau iya enda kala enda pulai lebuh kami sebilik serumpu ngintu pengerami.

Seminggu sebedau penusah nyadi, apai Aldrin (Gonda) bisi nerima kangau (call) ari iya madahka Aldrin deka ngirum ke duit belanja ngagai anak iya ti beumur enam taun, ti diuan aki enggau inek iya (Milah & Gonda) di Kampung Riih Mawang, enda jauh ari Jalai Tebakang-Serian.

"Niang Aldrin madah deka ngirum ke duit belanja nya kena 13 April 2020 enggau iya keran ngasuh aku mansutka duit nya hari siti (pagila)," ku Gonda.

Ku Gonda, nangkan ke nya, aku pan undur ke Serian laban deka ngambi duit ke dikirum niang enggau nyuaka duit nya ngagai uchu aku nya.

"Lebuh aku nyuaka duit nya ngagai uchu aku nya, aku betalipaun ngagai niang Aldrin enggau seduai iya menyanak lalu berandau enda lama. Nya meh kepenudi anak iya enggau kami sebilik berandau enggau niang Aldrin," ku Gonda nusuika jerita sebedau penusah ke enda disadang nyadi.

"Siti aku peminta aku diatu, aku ngarapka perintah ulih meri bantu duit belanja ngagai anak lelaki niang ti beumur enam taun nya nyentuk ke iya udah manggai umur 18 tahun," ku Gonda ti minta saup ari Opis perintah.

Nitihka penerang, bangkai niang ASP Aldrin udah datai di Kuching pagi tadi.

Berebak enggau tu, kami ari Berita Iban Online, ngarapka perintah menua kitai ulih ngemendarka peminta ke dipinta apai niang ASP Aldrin Gonda.

Enda berasai ai mata labuh naya ngenang penusah ke ditapi bala ke sebilik enggau niang ASP Aldrin, kelebih agi ngagai bini enggau anak iya.

Ngarapka semua sida sebilik ulih besabar napi penguji ti chukup besai tu. 😢

Aram kitai sama besampi ngambika semengat niang Aldrin begulai manah enggau orang ti kudus di serega. Amen 🙏

RIP ASP Aldrin Gonda.. 🙏😢