Semua rayat Sarawak ti pulai ari menua luar, dikuarantin 14 hari ba rumah -->
Cari Berita

Advertisement

Semua rayat Sarawak ti pulai ari menua luar, dikuarantin 14 hari ba rumah

Admin | beritaiban@gmail.com
April 19, 2020

ILLUSTRASYEN PICHA: Mensia mayuh ngena Pemampul Idung enggau Mulut (mask) enggau mai kantung gari ba dalam airpot. 📷 #Bernama

KUCHING: Berengkah pagila (20 April 2020), semua rayat Sarawak ti pulai ari Semenanjung, Sabah enggau Labuan deka dikuarantin pengelama 14 hari ba rumah.

Sapit Kepala Menteri, Datuk Amar Douglas Uggah, madah taja pan dikuarantin di rumah tang deka dijaga tauka dikemataka Opis Menteri Pengerai Malaysia (KKM).

Ku Uggah, ti nyadi Chairman Komiti Mutarka Penusah Ngenyit Nengeri Sarawak (JPBNS), ngagai sida ke nadai rumah ba endur ke sangkai (Kuching, Sibu, Bintulu enggau Miri), sida deka diasuh diau ba Palan Kuarantin ke udah bisi disediaka perintah Sarawak.

“Atur tu dipejalai enggau diteritka berengkah pagila (20 April 2020), semua rayat Sarawak ti pulai ari Semenanjung, Sabah enggau Labuan deka dikuarantin pengelama 14 hari ba rumah.

“Sebedau tu sida pulai ari menua luar Sarawak dikuarantin ba hotel.

“Pengudah berandau enggau pakar tadi, kitai ngemutuska sida nya dikuarantin ba rumah enggau dijaga tauka dikemataka KKM.

“Ambika chunto enti iya datai tauka pulai ari Kuala Lumpur ngagai Kuching tang asal ari Sri Aman enti nadai rumah di Kuching, iya deka dikuarantin ba Palan Kuarantin di Kuching ditu. Kitai enda ngemendarka pulai ke Sri Aman laban nya deka mayuh begulai enggau komuniti,” ku iya ti madah entara pekara diputuska JPBNS ba aum kemari.

Uggah mansutka jaku tauka pekara nya ba Aum Pengarang Berita COVID-19 Sarawak ti diatur ba Wisma Bapa Malaysia ditu.

Nambahka nya, iya mega madahka semua rayat Sarawak ti pulai ari menua luar enggau udah chukup timpuh kuarantin pengelama 14 hari di Semenanjung, sida deka diberi notis diau di rumah (Stay Home Notice) pengelama 14 hari.

Lalu semua pejalai entara pelilih menua dalam Sarawak ti nengah darat, langit enggau sungai patut bisi permit ari polis ti nyadi dokumen sukung sebedau sida meli tikit bilun, bas, bot tauka pengangkut bukai, ku iya.

“Lalau tu ngagai sida ke deka bejalai tauka mindah ambika chunto ari Kuching ke Sibu, sebedau meli tikit minta permit dulu, nuan meli tikit semina enti udah bulih permit.

“Kitai chukup terit bekaul enggau pemindah ari kandang endur mirah ngagai kandang endur gadung, laban kitai enggaika chura nya betukar,” ku iya.