Semua rayat Sarawak ti pulai ari menua luar, dikuarantin 14 hari ba endur ke sangkai -->
Cari Berita

Advertisement

Semua rayat Sarawak ti pulai ari menua luar, dikuarantin 14 hari ba endur ke sangkai

Admin | beritaiban@gmail.com
April 21, 2020

ILLUSTRASYEN PICHA: Orang mayuh ngena Pemampul Idung enggau Mulut (MASK) enggau chunto katil endur orang ti dikuarantin pengelama 14 hari.

KUCHING: Semua rayat Sarawak ti pulai ari Semenanjung, Sabah enggau Labuan deka dikuarantin pengelama 14 hari ba endur ke sangkai (arrival) sebedau sida iya dikemendar pulai ke rumah.

Sapit Kepala Menteri, Datuk Amar Douglas Uggah Embas, madahka pekara nya ba aum Komiti Mutarka Penusah Ngenyit Negeri Sarawak (JPBNS), kemari (hari satu).

“Kena 17 April tu tadi, kami udah ngemendarka semua rayat Sarawak ti pulai ari Semenanjung, Sabah enggau Labuan deka dikuarantin pengelama 14 hari ba rumah.

“Taja pia, enti dipelajarka ari beberapa iti kes positif rayat Malaysia ti pulai ari Indonesia sangkai ba International Airpot Kuala Lumpur (KLIA) enggau kes positif ari Kuching enggau Miri orang ke baru pulai ari menua luar enggau Kuala Lumpur, kitai mestika kuarantin sida iya pengelama 14 hari.

“Uji nuan berunding enti nyema kes tauka orang ti positif nya enda dikuarantin, iya ti mai igi penyakit COVID-19 enggau ulih ngerampit peranak menua kitai,” ku iya mansutka jaku nya ba aum JPBNS, ditu.

Ku Uggah ti nyadi Chairman JPBNS, semua sida ti dikuarantin kategori tu deka dikemendarka pulai enggau nyambung kuarantin ba rumah pengudah pemutus peresa sampel ba hari ketujuh pansut negatif.

Naka sehari tu (kemari), urung 1,493 orang dikuarantin enggau agi dikemataka pengerai (PUS) ba 16 buah hotel di pelilih negeri Sarawak.

Ari semua sida nya, urung 186 orang udah abis timpuh kuarantin enggau dikemendarka pulang ke rumah.

Kemari, urung tujuh iku orang agi PUS baru ti udah regista diau di hotel enggau lima ari sida nya diau di Wasan Inn, Bintulu enggau dua di Hotel Purnama, Limbang.

“Ukum tauka undang-undang tu lalu dipejalaika tekala nya, semua penumpang domestik (dalam Sarawak) diasuh ngisi pom akuan e-kesihatan ti udah disediaka dalam laman web http://sdmc.sarawak.gov.my.

“Opis JPBNS deka ngangkat manah Prosedur Operasyen Stindit (SOP) nitihka utai tauka pekara ti baru nyadi enggau kes ti diterima kami,” ku iya.