Siku lelaki ditan polis, mai duku dagin ke balai polis Sibu Jaya -->
Cari Berita

Advertisement

Siku lelaki ditan polis, mai duku dagin ke balai polis Sibu Jaya

Admin | beritaiban@gmail.com
April 20, 2020

ILLUSTRASYEN PICHA: Siku lelaki ditan polis.

SIBU: Raban polis ke benung gawa ba balai polis Sibu Jaya, tekenyit lebuh siku lelaki datai ke balai polis nya enggau mai duku kena netak dagin, urung jam 5 lemai kemari, Hari Minggu.

Ketuai Polis Pelilih Sibu, ACP Stanley Jonathan Ringgit, madah lelaki nya (suspek), orang enda gawa (penganggur) enggau beumur 23 taun.

"Lebuh penusah nyadi, dua iku raban polis ke bisi ba dalam balai polis nya.

"Siku ari seduai iya ngasuh lelaki nya (suspek) nikauka duku dagin ke dipegai iya nya ke luar balai.

"Lebuh nya, lelaki (suspek) dipechayaka agi benung sebening pala (high) maya iya ditangkap polis. Iya (suspek) nadai ngelaban tauka engkasak lebuh iya ditangkap polis," ku iya lebuh dirandau pengarang berita sehari tu tadi.

Ku Stanley, lebuh raban polis bejalaika pengawa tanya saut, lelaki nya madah iya (suspek) mai duku dagin nya kena nyaga pengelikun tauka ngetanka diri empu ari kena serang orang siku.

Stanley madah, ari chara lelaki nya (suspek) bejaku tusahka mereti laban iya maya nya dipechayaka agi ngetatka pala (high) pengudah makai dadah.

Kelimpah ari nya, bisi bekau telih ba jari sepiak kanan iya (suspek) dipechayaka pengudah mukut cheremin jendila rumah iya empu.

"Lelaki nya (suspek) mega ngaku mai duku dagin nya ari dapur rumah iya.

"Lelaki nya (suspek) deka direman enggau dibai ke Opis Tasat Jenayah Narkotik laban deka diperesa ai kemi," tandu iya.