Siku lelaki ke nganjung bantu perengka pemakai ke rumah panjai di Ulu Julau dipelaba lemas -->
Cari Berita

Advertisement

Siku lelaki ke nganjung bantu perengka pemakai ke rumah panjai di Ulu Julau dipelaba lemas

Admin | beritaiban@gmail.com
April 8, 2020

PICHA DEKORATIF: Siku lelaki benung enchapak.

JULAU: Siku lelaki ari raban Pengeluan (Frontliner) ke nganjung bantu perengka pemakai ke rumah panjai di Sg Nilau, Ulu Julau dipelaba lemas pengudah perau ke ditepan iya karam ba semak Nang Senyuruk di Ulu Ensiring, ditu, kemari (Hari Dua).

Chief Polis Pelilih Julau, DSP Ismuni Umar madah penusah nyadi urung jam 5 lemai, lelaki ke dipelabaka lemas nya (Staf Frontliner) dikelala ngena Mazian Seliong (Masing), 35 taun, begulai enggau dua pangan ke sama gawa enggau iya benung deka mulaika diri ke rumah panjai sida iya empu nengah jalai ai.

"Siku lelaki diripotka lenyau, tang dua pangan iya mujur nyelamatka diri," ku iya lebuh dirandau pengarang berita, sehari tu tadi.

"Operasyen Ngiga enggau Nyelamat (SAR) agi benung dipejalaika raban polis, raban Bomba Malaysia enggau disaup peranak rumah panjai ke semak endur palan penusah nyadi.

Ku Ismuni, DUN Meluan, YB Rolland Duat Jubin mega bisi enggau nganjung bantu perengka pemakai nya tang iya ngena perau sebengkah agi.

"YB (Rolland) bisi madah ari benung ujan lebuh sida iya nganjung bantu perengka pemakai di Ulu Ensiring ba rumah panjai ke lumur lapan.

"Maya nya semina tinggal 'seterip' aja agi iya nya nganjung bantu perengka pemakai ke Rumah Nyayang," ku iya.

Ku iya, YB Rolland bisi mesan tauka ngasuh sida tiga bemalam ba rumah panjai ke penudi nya laban meda gaya hari enda berapa manah (majak petang) enggau ai sungai maya nya mega pasang besai.

"Tang taja pia, sida tiga enda ibuhka jaku tagang YB nya laban keran deka pulai ke Rumah Macha di Ulu Ensiring iya nya rumah panjai sida iya empu.

"Lebuh sida tiga benung mulaika diri ngena perau, enda memukai maya nya mega penusah ke enda disadang nyadi.

Nitihka penerang ke diterima beritaiban.com, bantu perengka pemakai  ke diberi ngagai sembilan buah rumah panjai deka dianjung ngena bilun kabang tang enda nyadi.

Nya alai sida iya nganjung bantu perengka pemakai nya ngena perau panjai.



Aram kitai sama besampi enggau ngarapka Mazian Seliong ulih ditemu enggau naka pengelengkas. Tuhan dinga ke sembiang kami. Amen  🙏