Siku lelaki parai lemas, mukat ba Sungai Baram -->
Cari Berita

Advertisement

Siku lelaki parai lemas, mukat ba Sungai Baram

Admin | beritaiban@gmail.com
April 16, 2020

KASIH AMAT: Raban bomba benung ngatung bangkai niang Albert.

MIRI: Siku lelaki ke diripotka lenyau Hari Dua pengudah iya nurun mukat ba Lubuk Amam, Sungai Baram, Marudi, ditemu parai lemas, tengahari tadi.

Penusah dipechayaka nyadi Hari Dua tu tadi, lebuh iya nurun ngetan pukat ngena perau ba sungai nya.

Peranak menua dia ke bisi mansa sungai nya, bisi meda perau ke dikena iya enggau perengka ke dikena iya mukat tang iya nadai dia tauka enda temu.

Nangkan ke nya, sida ke nemu penusah ke nyadi nya pan berumban pulai lalu madah penusah nyadi ngagai anak iya enggau ngaga ripot polis.

Pengari Opis Bomba enggau Penyah Penusah Sarawak, madah lelaki ke parai nya dikelala ngena nama Albert Anak Gunai Dadom, 64 taun mujur ditemu peranak dia urung jam 12.50 tengahari, kemari.

"Tubuh iya (Albert) ditemu melepu urung lapan kilometer penyauh ari Nanga Sungai Ridan, Baram ke endur iya dipelaba labuh.

“Tubuh niang dibai ke Jelatung Ridan, sebedau dianjung ngagai raban polis ngambika ulih bejalaika pengawa silik agi," ku iya lebuh dirandau pengarang berita, kemari.