Siku lelaki parai, ngelantak pun kayu di Kuching -->
Cari Berita

Advertisement

Siku lelaki parai, ngelantak pun kayu di Kuching

Admin | beritaiban@gmail.com
April 26, 2020

KASIH AMAT: Pendiau kerita (kanan) enggau bangkai Clarence dibap ngena kain chura burak (kiba) ba palan eksiden nyadi.

KUCHING: Siku lelaki parai pengudah kerita ke ditepan iya ngelantak pun kayu di Jalai Laksamana Cheng Ho, malam tadi (Hari Enam).

Ketuai Opis Tasat enggau Penguasa Trafik Sarawak, Superintenden Alexson Naga Chabu madahka, lelaki ke parai nya dikelala ngena nama Clarence Goh Wei Ping, ti nyadi Akauntan, 34 taun, orang ari Taman Rosewood, Jalai Tabuan Dayak.

Raban perubat ke bisi datai madahka, Clarence udah enda ulih diselamatka agi tauka udah nadai ba palan eksiden nyadi.

“Eksiden nyadi, lebuh Clarence deriba kerita kediri ari Jalai Song nuju ke Jalai Rock.

“Lebuh iya datai ba Trafik Light di Jalai Laksamana Cheng Ho, enda memukai kerita ke ditepan iya tepawah ke tisi jalai sepiak kanan lalu ngujungka iya ngelantak sebatang kayu," ku iya lebuh dirandau pengarang berita.

Ku Alexson, hari benung ujan enggau jalai basah maya eksiden nyadi, urung jam 7.10 malam nya.

“Tubuh tauka bangkai Clarence pengudah nya dianjung ke Sepital Besai Kuching kena bejalaika pengawa meresa silik agi,” tandu iya.

Kes agi dipansik ari baruh Seksyen 41 (1) Akta Pengangkutan Jalan 1987.