Siku lelaki parai tetimbakka diri empu, ngabas panjuk -->
Cari Berita

Advertisement

Siku lelaki parai tetimbakka diri empu, ngabas panjuk

Admin | beritaiban@gmail.com
April 28, 2020

ILLUSTRASYEN PICHA: Picha pendiau orang ti udah nadai dibap ngena kain chura burak.

SRI AMAN: Siku lelaki parai pengudah senapang patah ke dibai iya tetimbakka iya empu lebuh ngabas panjuk ba babas semak Kampung Empadi, Batu Lintang, kemari.

Ketuai Polis Pelilih Sri Aman, DSP Bingkok John madahka, lelaki ke parai nya dikelala ngena nama Uke anak Manggi, 62 taun, ti nyadi Pengajar udah pinchin.

Uke ditemu genturung pendiau ke enggau bejalaika Operasyen Ngiga enggau Nyelamat pengudah iya diripotka nadai pulai ke rumah kenyau ari Hari Minggu (26 April 2020).

Kena Hari Minggu urung jam 4 lemai, nya mih Uke kepenudi sekali dipeda ba rumah iya di Rumah Suntai, Kampung Empadi Tengah, Batu Lintang sebedau iya nurun ngabas panjuk ke di tan iya ba babas ti enda jauh ari rumah sida iya nya.

“Tang nyentukka kemari, Uke agi ga bedau pulai ke rumah.

“Bini iya pan nyau berasai enda lantang ati meda iya enda pepulai.

“Nangkan ke nya, bini iya lalu minta bantu ari genturung pendiau dia enggau ngasuh sida ngiga laki iya (Uke).

"Urung penyampau 20 genturung pendiau ti nurun ngiga Uke, sida mujur tetemuka iya tang iya udah enda enseput agi tauka udah parai enggau sida lali ngaga ripot polis," ku Bingkok.

Ku Bingkok, Uke ditemu ba dalam ba babas urung penyauh 10 kilomita ari jalai alun besai urung jam 3 lemai.

"Asil peresa raban Paramedik madahka, Uke udah nadai dalam timpuh 24 jam enggau iya dipechayaka parai laban lenyau mayuh darah ketegal bakal sereta anchur jari sepiak kanan.

"Asil pansik tumu, Uke dipelabaka terap lebuh mai senapang patah, senapang patah nya labuh ke tanah lalu nimbak jari sepiak kanan iya,” ku iya lebuh dirandau pengarang berita sehari tu tadi.

Ku Bingkok, asil peresa silik ba senapang patah ke ditingang ba belakang Uke bisi sigi leka seterum (umbang) ti udah meletup.

"Tang bisi  lima igi leka seterum ti ditemu ba dalam kantung sandik ke digantung pa kayu urung penyauh semiya ari palan iya ke ditemu," ku iya.

Bangkai Uke pengudah nya dianjung ke rumah bangkai Sepital Sri Aman kena bejalaika pengawa silik agi.

"Naka ke diatu, kes ditukuka nyadi Parai Ngenyit (SDR) tang pansik silik agi dipejalaika," ku iya.

RIP Uke anak Manggi.. 🙏